14. 8. 2019: Вігорлатьскый музей припоминать собі сто років од народжіня Ореста Дубая

15-го авґуста 2019-го року минать точно сто років од народжіня вызначного русиньского вытварника Ореста Дубая. Із той нагоды приготовив Вігорлатьскый музей в Гуменнім выставку выберу з богатой творчости того родака із Великой Поляны, днесь вже неіснуючого села, котре было в окресі Снина.

Як інформовала Яна Федічова, святочна вернісаж выставкы під назвов Орест Дубай, котра буде повязана з презентаціёв книжнкы з єднаков назвов, і котра выходить у словацько-русиньско-анґліцькій верзії, одбуде ся 15-го авґуста 2019-го року зо зачатком о 16.00 год. в концертній салї Вігорлатьского музею. Подію підпорив Фонд на підпору културы народностных меншын.

 

Орест Дубай

Орест Дубай народив ся 15-го авґуста 1919-го року. Быв то малярь, ґрафік, скулптор, ілустратор і педаґоґ. Належав ку особностям основательской ґенерації ґрафіків на Словакії. Штудовав на Руській ґімназії в Мукачові, пак продовжовав штудовати рисованя на Словацькій высокій школї технічній в Братїславі, де было Оддїлїня вытварного уменя і рисованя.

Вчіли го вызначны словацькы умелцї як Ян Мудрох, Мартін Бенка і далшы. Од 1945-го року головным жанром стала му ґрафіка. Од 1947-го року быв асістентом Коломана Сокола на Педаґоґічній факулті Універзіты Коменьского в Братїславі – Катедрї вытварной выховы. Пізнїше быв і ректором Высокой школы вытварных умень в Братїславі.

На домашнїй і загранічній вытварній сценї актівно діяв уж од 1941-го року. Быв членом дакілько вытварных ґруп, переданы му были вызначны домашнї і загранічны оцїнїня, наприклад тітул Народного умелця.Чехословакії.

Знамы сутьёго творы Токаїк in memoriam 19. XI. 1944 із 1949-го року, ілустрації в книжці поезії Богдана Ігоря Антоніча, є автором мозаікы в шпыталю в Бардеёві, зробив декоратівне скло про Chemko Strážske, композіції на фасадї будовы пивовару у Великім Шарішу, тапісарії на Братіславскім замку.

В роках 1988 аж 1989 подаровав Орест Дубай велику колекцію майже 800 своїх творів Вігорлатському музею в Гуменнім, котре втогды было іщі Краєзнавчім музеём, як іншпіратівный дар музею в роднім краю. Од 1994-го року має музейна ґалерія честну назву Ґалерійна сінь Ореста Дубая.

Дубай вмер 2-го октобра 2005-го року в Братїславі. Гуменне му при нагодї 700-ой рочніцї од першого писемного документу о містї в роцї 2016 удїлило Цїну міста Гуменне. Вігорлатьскый музей собі тот рік припоминать нелем сторічніцю од ёого народжіня, але і 25 років існованя ґалерії з його меном.

 

Выбер із подарованой колекції

Актуална выставка походить зо збіркового фонду Вігорлатьского музею в Гуменнім і представлює часть з подарованой колекції Дубаёвых творів. Навщівници будуть годны відїти творы з богатой ґрафічной творчости, мальбы, ужыткову ґрафіку (exlibris, поштовы знамкы), ілустрації, ідеёвы пропозіції творів, пластікы з каміня, порцелану, дерева і ґіпсу.

Юбілейну выставку доповнюють запожычены родинны фотоґрафії, особны предметы автора і вытварны творы сучасных авторів родины Дубайовых.

Як інформовала Федічова, остатня комплексна выставка творів Ореста Дубая у Вігорлатьскім музею одбыла ся у 2009-ім році із нагоды недожытых 90-ых народенин автора. В роках 2016 і 2017 зробив музей дві меншы выставкы ґрафікы під назвов О вічній тузі чоловіка… Ґрафіка І. і Ґрафіка ІІ. Выставка з нагоды сторочніцї од нардожіня Ореста Дубая буде приступна до 31-го октобра 2019-го року.

Петро МЕДВІДЬ, ЛЕМ.фм