14. 7. 2023: Гелена ҐІЦОВА-МІЦОВЧІНОВА: І співам, і плачу (4. часть з припралёваной книжкы з таков самов назвов)

Гелена Ґіцова-Міцовчінова

І співам, і плачу (4.)

***

Нещаслива мати

не чекать на світї

нияку славу,

нияку ноблесу,

бо верховинцї

предавно

запотрошыли

десь мою

адресу,

а до сердця

жаль мі

все принесуть.

 

Лем соколів

фанфарами

у славі витають,

бо крылаты

птахы высоко

з чачками лїтають.

 

Про них

фанфары і слава –

великы то дары,

бо над нима полїтують

белавенькы

хмары.

 

***
Та і мізерніця

грїхів наволочіть,

зато не отворю

зарошены очі.

 

І несподївано

нераз приголосить,

пак горячій пламінь

мама в сердцї гасить.

 

Нещастлива мати

не є тыж без грїху,

вна глядать на світї

радость і потїху.

 

***

Хочу тобі, мілый Боже,

тай на знамость дати,

же я ходжу ку потічку

ся высповідати.

 

Там, де пташкы выспівують

у зеленім гаю,

перед кралём-вітром верьбы

до землї ся кланяють.

 

Там я ходжу загладити

свій жаль,біль і горе,

де бы давно уж синїло

слызне синє море.

 

Там, де вітор із радостёв

плоты перескочіть,

де не відять заслызены

материньскы очі.

 

Там, де грїхы і болести

з себе мати зложить,

вірь мі, Отче мілосердный,

там є мій храм Божый.

 

***
Не знам, ці то правда,

може ся приснило,

же мі слово Боже

очі розъяснило.

 

Можу ясны фарбы

в сердце назливати,

а темны одразы

перемалёвати.