14. 7. 2020: Уповномоченый стрїтив ся з премєром і секретарём резорту културы

Уповномоченый влады Словацькой републікы про народностны меншыны Ласло Буковскый (на фотцї злїва) минувшый тыждень абсолвовав далшы стрїчі з представителями новой влады. У четверь, 9-го юла 2020-го року, стрїтив ся з премєром Іґором Матовічом, о день пізнїше із державным секретарём Міністерства културы Словацькой републікы Владиміром Долінаём (на фотцї справа).

Треба меншыновый закон

„Правдоподобно многых із вас інтересує, як довго іщі зістану у своїй функції, кедьже єм быв выменованый за попереднёй владной коаліції. Ани по стрїчі з паном премєром Матовічом не знам на тот вопрос одоповідь,“ написав на своїм офіціалнім фанпейджі на сітї Facebook Буковскый по стрїчі з Матовічом.

Як далше інформовав, з премєром наперек тому вели конштруктівну діскусію о компетенціях уповномоченого, о меншыновых правах і леґіслатівных замірах влады. Подля Буковского ся на стрїчі згодли на тім, же Словакії треба меншыновый закон, котрый буде управлёвати і інштітуціоналне забезпечіня меншыновых прав, што значіть, же ся вытворить новый уряд – „міністерство про меншыны“.

На стрїчі бісїдовало ся і о списованю населїня, котре буде на Словакії у 2021-ім роцї, што має про меншыны величезне значіня. Буковскый премєрови в повязаню з тым запропоновав, жебы послав позітівный сіґнал про меншыны, в котрім бы ся высловив за толерантну Словакію, в котрій ся меншыны не мусять бояти признати свою ідентіту.

Сполупраца з резортом културы

В пятніцю, 10-го юла 2020-го року, запрошіня на Уряд уповномоченого влады Словацькой републікы про народностны меншыны прияв державный секретарь Міністерства културы Владимір Долінай.

Долінай быв за державного секретаря выменованый зачатком юна, но з уповномоченым ся знають довше, кедьже тїсно сполупрацовали в рамках різных форумів, а і на засїданях Выбору про народностны меншыны, на котры Долінай ходив.

Новый державный секретарь одповідать на Міністерстві културы СР за область меншыновой културы, зато темов стрїчі было проїднаня різных форм културных проґрамів і дотацій і їх ефектівнїше наставлїня. Обидвоми ся згодли на тім, же дакотры механізмы підпоры про меншыны бы ся мали вылїпшыти і мали бы быти простїшы.

І на тій стрїчі Буковскый одкрыв тему слїдуючого списованя населїня. В повязаню з тым пожадав резорт културы о підпору трёх конкретных планованых подій, котры будуть присвячати ся літературній творчости, історії і народній културї народностных меншын.

Як інформовав офіціалный сайт уповномоченого, державный секретарь выразив пересвідчіня, же міністерство в тій темі буде одкрыте про сполупрацу і є пересвідченый, же ся подарить зорґанізовати сполочны події на пропаґацію културной і языковой розмаїтости Словакії. На стрїчі были так само обговорены і вопросы языковых прав і народностных музеїв.

Петро МЕДВІДЬ, ЛЕМ.фм, языкова управа: ред. АРК в СР.