14. 6. 2024: Вмер Володимір Біланин, русиньскый актівіста і меценат

Як інформовав сайт Русинські писателї Подкарпатя, 11-го юна 2024-го року вмер у віці 89 років Володимір Біланин, єден із лідрів русиньского возродного руху по 1989-ім роцї на Підкарпатю.

Народив ся Володимір Біланин 9-го апріля 1935-го року. У минувшому быв довгы рокы директором Ужгородьского бадательско-експеріменталного заводу нештандартного заряджіня, при котрім фунґовав народный фолклорный ансамбель із 120-ма членами, якый вів. Посередництвом того ансамблю Володимір Білянин пошырёвав русиньску културу по цїлім Совєтьскім союзї, кедьже ходили выступати по цїлій державі, і кедь Русинів офіціално не было.

По полїтічных змінах 1989-го року быв Володимір Біланин меджі тыма, котры пережывали за свій народ і хотїли му принавернути права. Актівно залучів ся на початку 1990-ых років до возродного руху на Підкарпатю.

Біланин быв членом презідії Народной рады Русинів Закарпатя ці членом презідії Ужгородьского общества імени Александра Духновіча. Так само быв членом комісії, котра удїлює Премію Александра Павловіча за русиньску літературу.

Сам быв великым меценатом русиньской културы, окремо выдавань книжок. Вдяка ёго фінанчній підтримцї вышло множество публікацій. Як колись повів писатель Іван Петровцій, котрый мав свій Бовт Файні Книгы в Ужгородї, майже ани єдна русиньска книжка не вышла без участи Біланина. Давав із своїх грошей, хоць уж быв на пензії, або знав позганяти спонзорів.

З послїднїх выдань, котры могли быти надрукованы і вдяка грошам або ініціатіві Володиміра Білянина, можеме спомянути книгу Русинські співанкы, котру позберала і упорядковала Олґа Прокоп, або збірку Казкы з телевізора, в котрій позберано 80 приповідок народів світа, якы Олґа Прокоп у 2019-ім роцї розповідала дїточкам в рамках телевізного проєкту.

„Володимір Федоровіч Біланин лишыв глубокый слїд у сердцях многых людей своёв одданов роботов на благо русиньского народа. Ёго вклад до розвоя русиньской културы і сполоченьского жывота тажко оцїнити. Він быв нелем лідром і актівістом, но і сердечным а добрым чоловіком,“ пише ся на сайтї Русинські писателї Подкарпатя. Вічная память!

Петро МЕДВІДЬ, ЛЕМ.фм, языкова і ґрафічна управа: АРК в СР.