14. 6. 2019: Осиф КУДЗЕЙ: Перерушіня, Полегота, Прінціп, Прирівнаня, Хыба (Байкы)
Перерушіня
На плюцнім докторка Мілка
гасить Борівчана Ілька:
„Заказую вам курити,
не смієте ани пити,
у корчмі высиджовати,
за невістами бігати...‟
„Дость, дякую,‟ гварить Ілько,
„не намагайте ся тілько –
моя стара мі в Борові
решта уж сама доповість.‟
Памятайте сі, мароды:
Важнї хворы сьте аж тогды,
коли вам уж не смакує,
што вам доктор заказує.
Полегота
Як уж быв Славко з Упора
вышетреный у доктора,
доктор повів: „Пане Славку,
зістив єм у вас квапавку.‟
Як Славко зачув звість таку,
повів: „Одлягло мі дакус,
бо єм думав, правду речу,
же то мі уж нервы течуть.‟
Теперь я пару слов речу
тым, што не мають серенчу:
Кедь ся все вечур ці рано
скаржыте, же є вам плано,
знайте, же дакус пізнїше
звыкне быти іщі гірше.
Прінціп
Даґде при Смоковцю Старім
раз вечур в єднім із барів
просить ся барманка Валіка
Русина-алкоголіка:
„Пояснийте мі, Еміле,
што є перпетум мобіле?‟
„Подля старого учіня
є прінціп в тых двох речінях:
– Наллїй, бо подопивано.
– Выпий, бо поналивано,
– Наллїй, бо подопивано.
– Выпий, бо поналивано...‟
Тото не з головы моёй:
Руснак ся чує ґероём
лем кедь мать пінязей много,
або мать в собі алкогол.
Прирівнаня
Радить в корчмі в Калинові
женач Мілан парібкови:
„Не жень ся, Андрію ґаджу,
послухай, добрї ті раджу –
волиш радше жыти сам,
або сі купити пса.‟
„Чом?‟ – просить ся тот Мілана.
„Бо пес любить свого пана
а бреше на чуджіх людей. –
У жены то наспак буде.‟
Манжелство бывать, важены,
тот звязок мужа і жены,
де єдно в каждім припадї
є все стропроцентно в правдї.
Тым другым, як час укаже,
є на двасто процент манжел.
Хыба
Із шпыталю близь Рожнявы
вышов паціент почорнявый,
перечітав діаґнозу
і заставив ся му розум.
Пак ся опамятав скоро
і рік: „Діліно докторос! –
Написав мі ту же ЛУЕС,
Лемже мі то не пасує,
бо я ся пишу Ґарайдош,
но не ЛУЕС, але Лаёш!‟
Неєден Ром аж нездраво
познать параґрафы, право,
но гіґіену, хвороты,
познать уж лем одты поты.
(З приправлёваной книжкы Хрумкы.)
