14. 5. 2024: В Чертіжнім одкрыли обновленый Цінтерь русиньскых особностей

В недїлю, 12-го мая 2024-го року, в селї Чертіжне, Меджілабірьского окресу, одбыла ся торжественна подія. Ґрекокатолицька парохія святковала храмовый праздник Вознесенія Господа, на котрій брав участь Высокопреосвященый Йона Максим, пряшівскый архієпіскоп і митрополіта.

По торжественній літурґії в містній церькви участны ішли на цінтерь, котрый є коло храму. На цінтерї є похованых дакілько вызначных русиньскых особностей, і так ся в остатнїм часї робила ревіталізація ёго части, жебы святочно одкрыти Цінтерь русиньскых особностей села Чертіжне.

На цінтері мож найти гробы Адолфа Добряньского, Михаіла Бескида, Юліа Ставровского-Попрадова, Іринея Ханата, але і далшых. Добряньскый має на цінтерї і деревяну скулптуру.

Участным приговорив ся адміністратор парохії отець Душан Храпчак, котрый спомянув рочніцї там похованых особностей. Приговор мав і отець Мілан Ясик, член Общества святого Йоана Крестителя і парох в Ольцї, котрый говорив о Адолфови Добряньскім і капчанями, котрыма спаять своїх сучасників, як і Русинів днесь.

На недїльній події приговорив ся далше староста села Петро Трічак, як і Володимір Противняк, председа Містной орґанізації Русиньской оброды на Словеньску. По приговорах наслїдовало одкрытя орьєнтачной табліцї, а торжество закінчіло ся молитвов панахіды, котру вів кір Йона.

Реконштрукцію цінтеря вєдно із селом реалізовала Містна орґанізація Русиньской оброды на Словеньску в Меджілабірцях і Ґрекокатолицька парохія Чертіжне. Проєкт, в рамках котрого прибыли і інформачны написы в русиньскім языку, підпорило Міністерство інвестіцій, реґіоналного розвитку і інформатізації Словацькой републікы.

Проєкт міністерство підпорило сумов 20 тісяч евр, село Черзіжне дало властный вклад далшых 5 тісяч евр.

Адолф Добряньскый од 1867-го до 1881-го року жыв у Чертіжнім. Одкупив там великостаток і з куріёв. І кедь вмер у Іннсбруцї, практічно у выгнанстві, поховали го в Чертіжнім. Курія Добряньского выгоріла почас Першой світовой войны.

Петро МЕДВІДЬ, ЛЕМ.фм, языкова і ґрафічна управа: АРК в СР.