14. 5. 2019: На словко з міністерков културы
Бісїдовали сьме з міністерков културы Словацькой републікы Любіцов Лашшаковов на тему Русины і підпора меншын.
• Панї міністерко, тот рік проходить Світовый конґрес Русинів у Старій Любовнї. Можу ся вас позвідати, як вы, главно з позіції міністеркы културы, спритимате Русинів на Словакії?
– Кедьже єм чоловік, котрый собі барз цїнить історію, звыкы, традіції вшыткых маленькых народностей і з позіції міністеркы културы мі приналежыть старати ся о всокочіня і розвиток културы народностных меншын на Словакії, щіро можу повісти, же з людьского і професіоналного боку маю к Русинам позітівне одношіня. То меншына із стабілным історічным місцём на теріторії Словакії, котра собі напарек тяжкым пробым у 20-ім столїтю сохранила свою народну, културну і реліґійну ідентічность. Доказом почливости словацького народа ку русиньскій културі є і Музей русиньской културы в Пряшові. І вдяка добросердечному характеру Русинів наше сполунажываня думам ани не може быти лїпше, і годно быти прикладом про остатнї меджіетнічны односины в Европі.
• В рамках выїздовых засїдань словацькой влады навщівлюєте і наш реґіон. Значіть реґіон, в котрім жыють передовшыткым Русины. Котра часть нашого реґіону вас найвеце ословила і чом?
– Почас свого короткого діятельства у функції міністеркы єм в рамках выїздовых засїдань влады мала тоту честь вецераз навщівити ваш прекрасный край. Нанещастя мі робочі задачі не уможнили відїти вашы главны памяткы і повноцінно заінтересовати ся вашов културов. І зато бы єм в близкій будучности барз рада, і як пріватна особа, навщівила, наприклад, Словацькый народный музей – Музей русиньской културы в Пряшові або вашы світознамы деревяны церькви, котры суть народныма културныма памятками.
• Кедь бісїдуєме о нашім реґіонї, о Русинах, тисне ся мі іщі позвідати, ці знате даяке русиньске їдло?
– Но, може будете зачудованы, але знам. Є то мачанка. Мамка мого мужа походить із села Германівцї, і кедь сьме там дость часто ходили свого часу, та все на фрыштик была мачанка. І барз нам смаковала.
• Спокійность народностных меншын є до даякой міры залежна од їх фінанцованя, але і од політікы державы направленой ку народностным меншынам. Рихтує резорт Міністрества културы Словацькой републікы даякы зміны в тых областях у найбизшім періодї?
– Знаєте, бісїдує ся, же фінанції не аж так важны в нашім жывотї, но я думам, же суть. Міністерство културы СР під моїм веджінём досправды намагать ся дати вклад до розвитку културы народностных меншын. Є то часть нашой історії, треба собі єй цїнити, треба ку нїй приступати не як ку културї меншыновій, але як векшыновій, чім хочу повісти, же вшыткы народности, котры жыють на теріторії той републікы, заслужать собі єднаку увагу.
Розговор вів: Петро КІМАК-ФЕЙКО, жрідло: Народны новинкы Інфо Русин.
