14. 4. 2021: Руску матку приял городоначалнїк Нового Саду

НОВИ САД – Делеґацию Рускей матки вчера приял городоначалнїк Нового Саду Милош Вучевич. Стретнуце витворене на поволанку пана Вучевича, а по реаґованю Матки и других здруженьох на винєшени оцени под час шветочного одкриваня бисти Тарасови Шевченкови у тим городзе, 10. фебруара того року.

Пан городоначалнїк ше урядово пребачел пре висловени нєнамирни гришки и понукнул сотруднїцтво городу зоз Руску матку и другима рускима орґанизациями у Покраїни и Републики.

На предкладанє предсидателя Рускей матки Дюру Папуґу (ред.: на фото другый справа), пан Милош Вучевич (ред.: на фото третїй справа) прилапел предкладанє же би город Нови Сад бул домашнї XVII Шветовому конґресу Русинох/ Руснацох/ Лемкох, хтори би требал буц отримани у юнию-юлию 2023. року у орґанизациї Рускей матки у Републики Сербиї.

Представителє РМ зоз домашнїма бешедовали и о других актуалних темох и ришованю проблемох хтори ше дотикаю самей Матки,  Руснацох як вообще так и у самим городзе Новим Садзе.

М. АФИЧ, фото: Н. КОБАЦ, РутенпреС

(Публікуёме в оріґіналї – войводиньскім варіантї русиньского языка.)