14. 12. 2019: Оцїнили русиньскых писателїв Ш. Смолея і Гелену Ґіцову-Міцовчінову
• Єден з оцїненых Цїнов пріматора Меджілаборець – Штефан Смолей.
• Єдна з книжок про русиньскы дїти од Гелены Ґіцовой-Міцовчіновой.
Місто Меджілабірцї ославило 75-ту рочніцю свого ослободжіня. Про домашнїх і навщівників міста приготовило штириднёвый проґрам.
В проґрамі быв ярмарок, привітаня дїтей до жывота, варїня капустніцї, концерт Рутенії, театралне выступлїня ТАД, пєтный акт кладжіня вінцїв ці выставка Од утишыня ку войнї Російского воєньско-історічного общества, котру їм дала Амбасада Російской федерації в Братїславі. Днї міста ся одбывали вєдно з рочніцёв ослободжіня в день 26-го новембра 2019.
З нагоды 75-ой рочніцї ослободжіня місто оцїнило двох жытелїв, русиньскых писателїв Штефана Смолея і Гелену Ґіцову-Міцовчінову. Дістали Цїну пріматора міста за їх принос в области културы і літературной творчости. Г. Ґіцова-Міцовчінова написала многы стишкы про дїти, котры были опублікованы в русиньскій пресї (Народны новинка, Русин, Русиньскый літературный алманах), але вышли і в 17-ёх книжочках , як наприклад Фіялочка, При ярочку, Родина Русина і іншых. Штефан Смолей, родак з Рошковець, є автором 29 книжок, як Тяжкый жывот, Запискы обычайного вояка, Чудны думкы, Не ганьб ся, Русине, Юрковы прьгоды, Бескидьскы співы і много іншых. За книжку Бурї над Бескидами здобыв Премію Александра Духновіча за русиньску літературу, котру удїлює Карпаторусиньскый научный центер в США.
Podvihorlatské noviny (Кор. АК)
