14. 10. 2022: Гелена ҐІЦОВА-МІЦОВЧІНОВА: Стихы

Гелена Ґіцова-Міцовчінова

***

Ходить осїнь

не з глядилом,

але горов

з кадилом.

 

В град ледяный

зимі дверї 

отворити,

лїсных духів

з кадилом

выкурити.

 

А з облака

уж вызерать

Дїда Мороза,

в ярочку

ці не збачіть

в білій робі

снїгурочку.

 

***

Він безкрылый,

не мать рукы,

не мать ногы

та і слова

не говорить,

браны в селї

сам отворить.

 

Сміло світом

як дух лїтать,

лемже нихто

луфтолетця

в цїлім світї

з пукетов

не привітать.

 

***

Хто в дворї отворив

з скрипотом брану?

То быстрый вітрило,

што уж в садї вночі

крутив обертану.

 

Бо сидить з жезлом

мороз в ярочку,

чекать у чіпочках

уж і снїгурочку.

 

Чародійка в меджі

за крячком не дримать,

бо у кожушинї

летить панї зима.