14. 10. 2020: Уповномоченый зо шефом діпломації бісїдовали о меншыновім законї

Уповномоченый влады Словацькой републікы про народностны меншыны Ласло Буковскый 13-го октобра 2020-го року в просторах Міністества загранічных дїл і европскых справ стрїтив ся зо шефом словацькой діпломації Іваном Корчоком.

Інформовав о тім офіціалный сайт уповномоченого. Стрїча была продовжінём серії їднань з членами влады Словацькой републікы ку актуалным вызвам і задачам в области меншыновой політікы державы.

Бісїдовали о меншыновім законї

Почас їднаня пріорітно занимали ся повнїнём Проґрамового выголошіня влады, конкретно приправов закона о народностных меншынах. Уповномоченый приближыв міністрови Корчокови процес творїня будучого закона, котрый має рефлектовати актуалны вызвы і припомінкы народностных меншын.

Буковскый і Корчок были згодны в тім, же закон має выходити з добрых европскых прикладів, но мусить быти і в згодї з конштітуціёв а меджінародныма документами, і обовязками Словацькой републікы.

Так само занимали ся дакотрыма задачами, котры выходять із заключінь Змішаной словацько-мадярьской комісії про справы меншын з минувшого року.

Уповномоченый на їднаню ініціовав злїпшіня сполочного поступу при аплікачній практіцї меншыновых языковых прав у згодї з Хартов реґіоналных або меншыновых языків, як і приправу інформачных матеріалів як про хоснователїв, так і про повинны субєкты.

Влада ся завязала прияти закон

Владный кабінет премєра Іґора Матовіча прияла своє Проґрамове выголошіня влады 19-го апріля того року.

В документї ся влада завязала, же прийме закон о поставлїню народностных меншын „як єдно із средств спомалїня асімілації членів народностных меншын і ґаранцію уплатнёваня меншыновых прав выходячіх з Конштітуції Словацькой републікы. Закон буде управлёвати поставлїня народностных меншын і дослїдно апліковати і прецізовати їх права ґарантованы Конштітуціёв Словацькой републікы.“

Окрем того, влада у выголошіню споминать, же буде роздумовати о можности зряджіня Уряду про народностны меншыны, жебы дати можность хосновати членам народностных меншын конштітучне право брати участь на рїшіню дїл публічных.

Приготовлїнём меншынового закона быв владов повіреный якраз міністер  Корчок і ёго резорт діпломації Словацькой републікы. О то, жебы влада прияла меншыновый закон жадав і Выбор про народностны меншыны і етнічны ґрупы Рады влады Словацькой републікы ро людьскы права, народностны меншыны і родову рівность. Членове выбору схвалили і леґіслатівный замір такого закона, котрый быв приготвлёваный іщі за бывшой влады.

Петро МЕДВІДЬ, лем.фм, языкова управа: ред. АРК в СР.