13. 9. 2024: Перша етапа рештаврованя цїнного іконостасу закінчена

Вігорлатьскый музей в Гуменнім закінчів першу етапу рештаврованя іконостасу із деревяной Церькви святого Михаіла Архістратига, яка была збудована у 1764-ім роцї в Новоселіцї, Сниньского окресу, і в 1974-ім роцї быв храм перенесеный як першый обєкт до Експозіції народной архітектуры і бываня (сканзену) Вігорлатьского музея.

Як за музей інформовала Івана Стракошова, іконостас першый раз рештавровав ся при перенесїню храму до Гуменного. Впливом часу і експонованя є моментално пошкоджена вытварна і архітектонічна часть.

Цїлём першой етапы реалізації проєкту, котра є закінчена, было рештаврованя трёх із штирёх ікон головного шору іконостаса – іконы святого Николая, Богородіцї і Хріста, вєдно з їх архітектуров.

На окремых іконах была упевнена поліхромія, наслїдовало очіщіня мальбы од лаків, старшых ретушів і одсторонїня старшых ґітів. Далше ліпили ся роздїлены части підложкы і архітектуры, робила ся петріфікація і доповнїня хыбуючіх деревяных елементів. Потім были доґітованы части, де хыбовали малярьскы верствы i поліхромії, выконало ся поліментованя, і так ся наношало золото і стрїбро.

На кінцю іконы перешли оптічным сцїлїнём ретушованём і фіналным лакованём. Тісно перед початком тогорічной турістічной сезоны были іконы наіншталованы на своє місце в рамках іконостасу.

Першу фазу рештаврованя цїнного іконостасу з Новоселіцї выконовала Людміла Зозулякова у своїм ательєрї в Кошіцях.

Петро МЕДВІДЬ, ЛЕМ.фм, языкова і ґрафічна управа: АРК в СР.

Фото: Архів Вігорлатьского музея.