13. 9. 2019: До волеб до мешныновых самосправ у Мадярьску ідуть Русины на трёх списках

Мадярьска Народна выборча комісія у вівторок, 10-го септембра 2019-го, року вылосовала чісла, під котрыма будуть іти кандідачны спискы до волеб до народностных самосрпав, якы будуть проходити 13-го октобра 2019-го року вєдно із комуналныма вольбами.

В Мадярьску є тринадцять вызнаных народностных меншын, котры собі можуть выбрати свої меншыновы самосправы. Подля мадарьской державной аґентуры MTI комісія до віторка вечур заевідовала 19 народностных кандідачных списків, причім порядок списків лосовала в припадї 9-ёх нарностей.

Штири народности – булгарьска, нїмецька, словіньска і словацька, собі зареґістровали лем по єднім списку кандідатів, зато дістали од Народной волебной комісії чісло 1. Вылосованы чісла служать на зараджіня кандідачных списків окремых номінуючіх орґанізацій на цїлодержавный лист голосованя.

 

Русины мають три спискы

Найвеце кандідачных списків із вшыткых меншын, цїлково сім, зареґістровали собі Ромове. Русинів буде мож выберати із трёх списків.

Як інформовав портал Hirado.hu, чісло єден за русиньску меншыну дістав кандідачный список Общества русиньской інтеліґенції імени Антонія Годинкы. Чісло два было вылосоване про Общество русиньской меншыновой солідарности. З чіслом три буде кандідовати список Общества Русинів/Рутенів Мадярьска.

 

Русиньскы меншыновы самосправы

Русины бы собі на основы даных зо списпваня населїня із 2011-го року будуть в октобрї выберати склад 44-ох містных самосправ. Жебы могла выникнути меншынова самосправа, мусить в окрузї жыти подля офіціалных даных мінімално 25 людей, котры ся приголосили ку меншынї, якой самосправа там має выникнути.

Меншыновы волителї ся мусять зареґістровати до 27-го септембра 2019-го року. Покля є  в реґістрї меншыновых волителїв записаных менше як сто людей, будуть собі членове меншыны выберати трёх представителїв до самосправы. Пять представителїв буде мати самосправа, покля є меншыновых волителїв мінімално сто або веце.

 

Вседержавна самосправа

Вольбами сформує ся і нова Вседержавна русиньска самосправа. Тота має 15 членів. Подля того, кілько процент здобуде цїлково в містных самосправах окрема меншынова орґанізація, котра зареґістровала кандідачный список, буде мати і кількость членів вседержавной самосправы. Покля ся член меншыны приголосить до меншынового реґістра, вже не має можливость голосовати за спискы полїтічных партій в комуналных выборах.

Петро МЕДВІДЬ, ЛЕМ.фм