13. 8. 2021: Гелена ҐІЦОВА-МІЦОВЧІНОВА: Стишкы

Гелена Ґіцова-Міцовчінова

Просила ся мамка
дївочкы і сына:
знате яка же то 
молитва Русина?

Молити ся Отче наш,
ту молитву щіру,
хранити потомкам
хрістіаньску віру.

Іщі із радостёв
своїй мамції гварять
научіти ся чітати
слова із букваря.

***
Як куточок домовины
як же не любити,
кедь ся не дасть за ниякы
пінязї купити.

Любить ёго отець, мати,
люблять і малятка,
то дар сердця про Русинів
є вічна памятка.

А я стишок написала
з великой радости,
же край родный під Бескідом
як перла у брошцї.

***
Ой, як краснї, премілено
на тім світї жыти,
кедь ся можуть співаночков
люде потїшыти.

Під  Бескідом  назберати
материну душку
а у садї коштовати
солоденьку грушку.

Де чекають і родічі
черешнї розвиты,
там не можуть родне слово
дїточкы забыти.

Там із спаня землю будять
золотенькы лучі,
я віночок звити біжу
на лужок квітучій.

Хочу співом материньскым
серденька зогрїти
а русиньске злате слово
в стишку сохранити

(З приправлёваной книжкы авторкы – Поклад русиньской матери.)