13. 8. 2020: Джарет Лето як Енді Варголь

Енді Варголь доднес є жывый в памяти любителів і своіх наслідників. Перед парома днями, 6. серпня/авґуста, проходила дальша річниця його народжыня, што каждого рока єст анонсуване через ріжны культурны середовиска, в тым русиньскє.

Як раз дознали сме ся, што в найблизшым часі буде реалізуваный біоґрафічный фільм про того єдного з найвызначнійшых русиньскых артистів на світі. Поінформувал о тым на своім інстаґрамовым конті Джаред Лето, якій має грати головного героя – Енді Варголя.

«Так, то правда, буду грал Енді Варголя в надходячым фільмі. Єм вдячный і підексцитуваный з той причыны. Спізнене вшыткого доброго з нагоды річниці народин, Енді. Тужыме ся Тобом і за Твоім ґенійом», писал Лето в пості посвяченым артисті.

Лето, котрый был м.ін. Джокером в фільмі The Suicide Squad, буде найпевнійше і продуцентом біоґрафічной оповісти о Варголи. Покля што не знатя, на коли плянувана є премєра фільму, ани коли зачне ся його реалізация. Надієме ся, што не бракне однесінь до русиньского походжыня Варголя.

Нова біоґрафічна продукция про Варголя то правдоподібні тот сам проєкт, в котрый актор мал быти заанґажуваный в 2016 році. Наголовок проєкту то Варголь, опертый є він на книжці Віктора Бокріса Warhol: The Biography, а заадаптуваный через сценаристу The Wolf of Wall Street Теренса Вінтера.

Актор Джаред Лето знаный є з того, што знат драматичні зміняти ся для ролі, жебы тота набрала характеру. В фільмі Dallas Buyers Club вошол з ролю транссексуальной жены зараженой вірусом HIV, яка была залежна од наркотиків. Отримал за ню Оскара.

Сам Варголь тіж мал в своім жытю епізод звязаный з акторском гром. Выступул м.ін. в фільмах Cocaine Cowboys ци Tootsie.

Севериян КОСОВСКЫЙ, ЛЕМ.фм, публікуєме в оріґіналї – лемківскім варіантї русиньского языка.

Script logo