13. 6. 2024: На градї в Старій Любовнї выставили кралёвску едіцію Варгола

На градї Любовня  выставили цїнне дїло Енді Варгола, в рамках експозіції ловецького салоника Палаца Любомірьскых буде мож відїти го до кінця септемра того року. Інформовала о тім аґентура TASR.

Директор Любовняньского музея Далібор Микулик повів, же іде о комплетне портфоліо Кралёвной Нытомбі. Ёго цїнность потверджує головно факт, же іде о такзавну royal edition, значіть кралёвску едіцію посыпану діамантовым порохом.

„Значіть то, же ёго частями суть штири образы той самой кралёвны, но все в іншій фаребній варіації, причім за комплетне портфоліо бере ся комбінація вшыткых штирёх образів, котры творять єден цїлок. Тото портофіліо кралёвной Нытомбі є зроблене техніков screenprint – сітёдрук, котру Енді Варгол хосновав майже при вшыткых своїх творах,“ повів Микулик.

Світово познатый твор Енді Варгола подарило ся в Старій Любовнї выставити вдяка сполупраці з Музейом модерного уменя Енді Варгола в Меджілабірцях, одкыль го перевезли.

„На світї є лем пять фалатків той кралёвны. Образ сьме дали якраз до Палаца Любомірьскых, котрый як послїднїй перешов реконштрукціёв, значіть, є в нїм рекуперація і має так само безпечностных атрібуты. Єдночасно на облаках суть фолії, жебы го не пошкодило денне світло,“ додав директор.

Як повів, то найдорогшый образ, якый мали історічно на граді. Енді Варгол єднакым штілом зробив і кралёвны Голандії, Данії а Великобрітанії.

„Нашым цїлём было такым сімболічным способом скапчати кралёвны Енді Варгола з кралёвнами, котры колись навщівили наш град, ці то была угорьска кралёвна Марія І. або як послїдня іспаньска кралёвна Ісабел де Борбон. Думам, же ся нам то подарило,“ сконштатовав директор.

Петро МЕДВІДЬ, ЛЕМ.фм, языкова і ґрафічна управа: АРК в СР. Фотоґрафія: Любовняньскый музей.