13. 5. 2020: Сайт, котрый інформує о корнавірусї є і в меншыновых языках, включно русиньского

Словакія далше продовжує в пошырёваню двоязычности, жебы тым были наповнёваны права народностных меншын хосновати і быти інформованы у своїм материньскім языку в рамках урядного контакту.

Актівности, котры были інтезнівнішы започаты почас минувшой влады, коли быв до функції уповномоченого влады Словацькой републікы про народностны меншыны і етнічны ґрупы выменованый Ласло Буковскый, якый дотеперь не быв новов владов одкликаный і продовжує у своїй роботї, теперь реаґують і на сітуацію коло пандемії нового тіпу коронавірусу.

Першый раз в історії

„Надзвычайна пандемія на Словакії принесла то, што дотеперь было незнамым. В повязаню з приятыма наряджінами COVID-19 змінив ся погляд державы на меншыны і важность комунікації в їх материньскім языку,“ інформує сайт уповномоченого.

Першый раз в історії Словакії ся різны інштітуції і Уряд уповномоченого влады про народностны меншыны споїли і вытворили пять меншыновых мутацій централного вебсайту korona.gov.sk. Тот сайт приносить основны даны, окрем словацького і анґліцького языка, і в мадярьскім, ромскім, русиньскім, україньскім і нїмецькім языку. Хоць на Словакії є 13 державов вызнаных народностных меншын, лем тых пять меншын має холем в єднім селї над 20 процент населїня і так мають право на урядну комунікацію в материньскім языку.

Части вебсайту, котры суть писаны в языках споминаных народностных меншын, забезпечує Уряд уповномоченого влады про народностны меншыны.

Цїнны скушености

„Самособов, публікованя мінячіх ся актуалных інформацій часто перекрачує можливости перекладателїв і капаціту одборників. Актуалізовати пять підсайтів є барз складна задача. Наперек тому їішіня і приступ одповідных орґанів і людей беру за барз важный і з довгодобого подляду хосенный, тадь членове народностных меншын мають право здобывати інформації у своїм материньскім языку. Я пересвідченый, же сьме здобыли цїнны скушености, котры поступно можеме схосновати при аплікації языковых прав меншын і в іншых областях верейной справы,“ підкреслив Ласло Буковскый, уповномоченый влады про народностны меншыны.

Петро МЕДВІДЬ, ЛЕМ.фм

Script logo