13. 4. 2022: 60-рочный юбілант директор Театру А. Духновіча в Пряшові – МАРІАН МАРКО
• Toмаш Тепфер і Маріан Марко у філмовім серіалї „Četnícke humoresky“.
Маріан Марко нар. ся 11. 4. 1962 у Меджілабірцях, але походить із Полаты, русиньского села на северовыходї Словакії, недалеко польскых граніць. Быв герцём а в послїднїх роках є директором Театру Александра Духновіча (ТАД) в Пряшові.
По матурї на Ґімназії у Меджілабірцях продовжовали ёго штудії на Стройніцькій факултї в Кошіцях. Свої умелецькы способности проявляв в аматерьскім драматічнім колектіві Думка а окрем гого гров на саксофон, котрого тоны ся часто несли по ходьбах Штудетьского домова кпт. Налепкы на ул. Ферка Урбанка. По двох роках вырїшыв охабити даны штудії строярьства і наступив до Театру Александра Духновіча в Пряшові (ТАД). Такой дістає меншу роль в серіалї „Vlak detstva a nádeje‟ (1985) і роль Адолфа Добряньского режісера Карла Горака.
В слїдуючіх роках успішно абсолвує штудії герецьтва в Інштітутї Карпенка Карого у Кієві. По навернутя ся домів на трывало удомашнив ся на сценї ТАД. Із множества ёго сценічных ролей спомяньме холем роль Меррезка у пєсї Млин щастя, дале наслїдовали ролї: Калімако у грї Мандраґора, Фіґаро у пєсї „Barbier zo Sevilly‟, Старіков у грїм Женитва, бача Ондрей у грї Бачова жена ці Лаборець у пєсї Стрїберный потічок.
Затля найвекшый простор дістав у ролї Ґорбу в епізодї Розбійник зо серіалу „Četnícke humoresky“ (1997). Малы ролї дістали в серіалї і далшы герцї ТАД, якы там бісїдовали по русиньскы як люде з Підкарпатьской Руси. Не треба забыти і нa ёго ролї „výtržník“ у філмі Фраґменты з маломіста (2000) режісера Петра Мікуліка, хатарь у філмі Музика (2007) режісера Юрая Нвоты і мафіан у філмі „Návrat bocianov‟ (2007) режісера Мартіна Репку. Маріан Марко повторно брав участь у проєктах Матуша Ольгы. Спомяньме холем серіал комедіалных пригов зо жывота нашых предків „Popaterce na nas“, вытвореный на основі предлогы шарішского фоклорісты Яна Лазорика, котрый быв награтый у кошіцькім штудію Словацького радія.
Од року 1999 уж го лем рідко стрїчаме на сценї театру і часто го мож стрїтити при різных подіях як невтомного директора Тетру А. Духновіча в Пряшові.
Здрой: ČSFD.cz. Переклад із словацького языка: А. З.
Ку многым ґратулантам з нагоды округлого юбілею М. Марка припоюють ся і члены Обчаньского здружіня Акладемія русиньской културы в СР.
