13. 3. 2021: Сатиричну кухарску книжку Енді Варголя выставили на авкцию

Енді Варголя певно не треба никому представляти, а уж особливо не русиньскій соспільности. Творця ґрафік баньок з помідоровом поливком мал на своім конті і інчы проєкты звязаны з кухньом. В авкцийным домі Bonhams в Ню Йорку появила ся сатирична книжка артисты під наголовком «Дикы Малины» (анґ. «Wild Raspberries»). Буде мож єй выліцитувати на онляйновій авкциі.

Книжка была зроблена в 1959 р. з помочом проєктанткы інтерєру Сузі Франкфурт, мамы Енді Юлиі та штырьох хлопців, якы мешкали над Варгольом. Франкфурт написала гумористичны рецептуры, Енді іх ілюструвал, а сусіды покольорували. Зас мама Юлия выкаліґрафувала текст. Написаны Сузі Франкфурт пародиі переписів то примірово: омлет Ґреты Ґарбо, котрый треба все істи самому і при свічках, карп по жыдівскы, котрый треба зробити з рыб, што закусали ся в морскій воді, ци підсмажаный рогач, котрого треба знагла застрілити, будучы схованым, не мож за ним ганяти.

Як подає «The Guardian», Варголь познал Франкфурт, коли тота зачала го слідити, будучы під вражыньом по тым, як виділа роботы Варголя в реставрациі Serendipity 3 в Ню Йорку. Сузі описала «Дикы Малины» як «цікаву кухарску книжку для люди, котры не варят».

«Моя мама, котра была ґаздыньом sine qua non, думала, што найважнійшым для молодой невісты є быти добром ґаздыньом. Очывидно прібувала-м єй наслідувати, а то был як раз час, коли на рынку явили ся вшыткы тоты французскы кулінарны порадникы» – бесідувала Франкфурт.

Артистка оповідала тіж, што не знала ани, чым є бешамельовый сос, і тото почутя затрачыня спричынило, же зробили з Енді книжку. Оставили вшыткы орфоґрафічны хыбы мамы Варголя.

Подля авкцийного дому Bonhams, лем 34 примірникы книжкы вказали ся в кольорі, а векшіст была дарувана приятелям і родині, не были продаваны.

«Сеса книжка ідеальні презентує підступну натуру векшости робіт Варголя. Книжкы были зроблены на весело і часто роздаваны приятелям і клієнтам вчас Різдва» – повіл Даррен Сатерленд з Bonhams в маґазині «The Guardian».

Некотры примірникы были проданы в споминаным Serendipity 3, якє фунґувало і як свого рода ґалерия штукы, а де часто бывал Варголь. Сатерленд повіл, што сесы книжкы вказуют на забаву і жартобливіст, якы товаришыли в розвитку Варголя як артисты.

Франкфурт і Варголь думали, што книжка буде майстерштиком і продаст ся в тысячах примірників. Продали найпевнійше коло 20 штук.

Наталія МАЛЕЦЬКА-НОВАК, ЛЕМ.фн, фот. Bonhams

Script logo