13. 12. 2024: Выстава цїнных візантійскых ікон в Римі

Выстава є безплатна і єдным із кураторів є родак із Підкарпатя.

У 2025-ім роцї буде Католицька церьков святковати Святый рік. Юбілейный рік 2025 з моттом Путници надії, быв выголошеный булов Папы Римского Франціска, і є 27-ым рядным юбілейом роком в історії Католицькой церькви, другым в часі понтіфікату сучасного Вселеньского Архієрея.

Дікастерія про євангелизацію – Секція про основны вопросы євангелизації у світї, котра є одповідна за орґанізацію Юбілейного року 2025, вєдно із ватіканьскыма музеями одкрывать теперь пяту подію в рамках ціклу Юбілей є култура, і то тыждень перед одкрытьом Святых дверей Базилікы святого Петра.

Од 16-го децембра 2024-го року до 16-го фебруара 2025-го року буде в Костелї святой Аґнесы в Аґоне (Chiesa di Sant’Agnese in Agone) в Римі сприступнена выстава ікон під назвов Іконы надії. Путь віры у Ватіканьскых музеях, котру кураторьскы вєдно приготовили Анна Піццамано і Петро Береш – родак із Підкарпатя, якый довгы рокы є робітником ватіканьскых музеїв.

Петро МЕДВІДЬ, ЛЕМ.фм, языкова і ґрафічна управа, скорочіня: АРК в СР.