13. 12. 2018: Одпрезентовали моноґрафію о театралнім меморіалї

У віторок, 11-го децембра 2018-го року, в Домі културы в Руськім Керестурї была одпрезентована недавно выдрукована моноґрафія Дюры Латяка під назвов 50 роки Драмского мемориялу Петра Ризнича Дядї (50 років Драматічного меморіалу Петра Різнича Дядї) за участи автора.

Як інформовала аґентура Рутенпрес, в менї єдного із выдавателів – Дому културы, ёго директор Йоакім Рац подяковав Міністерству културы Сербії, котре фінанчно помогло выданю, як і вшыткым, котры будьякым способом підтримали тоту публікацію, яка вышла із нагоды округлой річніцї заснованя того театралного фестівалу.

 

Маєме надію, же театер ся утримле

О значіню той моноґрафії за Завод про културу войводиньскых Русинів бісіїовала ёго директорка Анамарія Ранковіч, о моноґрафії і условіях, в якых подарило ся єй зробити зясь бісїдовав сам автор Дюра Латяк.

„Театралне діяльство, покля ся не запише, як кебы єй ани не было. В тім контекстї і тота книжка має велику вартость про наш театралный жывот, о котрім собі думаме, же ся утримле і надалше, і при вшыткых тяжкостях,“ повів Латяк.

Презентація новой моноґрафії має, подля інформаціями аґентуры Рутенпрес, одбыти ся іщі і в Новім Садї. Публікація ся не буде продавати, выдавателї єй хотять роздати театралным діятелям і културно-умелецькым обществам, як і далшым інштітуціям.

 

Драматічный меморіал Петра Різнича Дядї

Театралный фестівал, котрый шторік орґанізують войводиньскы Русины в Руськім Керестурї свій округлый юбілей зоснованя святковав на ярь того року. Фестівал має все у проґрамі пєсы домашнїх, войводиньскых театрів і театрланых ґруп, нераз на фестівалї брав участь і Театер Александра Духновіча з Пряшова, як єдиный професіоналный русиньскый театер у світї. Почас фестівалу проходять і різны діскусії ці бісїды о русиньскім театралнім жывотї.

Петро Різнич Дядя, котрому є меморіал присвяченый, быв актором, режісером, педаґоґом і културно-освітнім діятелём серед Русинів у Войводинї. О театер зачав інтересовати ся іщі на ґімназії, котру абсолвовав на Українї, в части, котра належала Російскій імперії, де ся народив. В 1919-ім роцї переселив ся до міста Старый Вербас і зачав орґанізовати драматічны кружкы меджі войводиньскыма Русинами. Театралны пєсы зачав робити в Руськім Керестурї, Коцурї, но і в іншых центрах русиньского неселїня. У 1933-ім роцї засновав у Вербасї театер Руска драма. По Другій світовій войнї ся переселив до Руського Керестура, де чітав лекції російского языка, но засновав там і драматічный і фолклорный ансамбель. У 1948-ім роцї засновав першый русиньскый аматерьскый театер і о два рокы пізнїше і бабковый театер. Ёго мену суть присвячены як споминаный меморіал, так і Руськый народный театер Дядя.

Петро МЕДВІДЬ, лем.фм, жрідло фотоґрафії: Рутенпрес