13. 11. 2019: Дїдовизна Юрія Мацана в сниньскім каштелю

Місто Снина і Містьскый културный і освітній центер в Снинї орґанізують выставку, котра презентує творчость особности вытварного жывота в Снинї по 1970-ім роцї.

Цїложывотнов темов вже небого вытварника была родна країна – країна отцїв, дїдів, прадїдів, як і закутины повны квітів реалізованы оліёвыма фарбами і сухым пастелом.

 

Учітель і малярь

Юрій Мацан цїлый свій актівный жывот присвятив учітелёваню, коло того все нашов собі час і на властну творчость. По закінчіню єденацятьрічной школы в Снинї одышов як некваліфікованый учітель до Збоя. Там пришов на то, же має талент про вытварну творчость. По роцї одышов штудовати вытварну выхову.

По закінчіню высокошкольскых штудій 15 років учів на школї у Великій Полянї. Окрем того, занимав ся малёванём. Робив оліёмальбы, образы сухым пастелом і лавіроване рисованя тушом. Фасціновала го архітектура деревяных храмів на выходї Словакії.

Сухым пастелом поступно звічнив храмы в Руськім Потоцї, Тополї, Яловій, Шмиґовцї. Захопив і храм з Новоселицї, котрый находить ся в гуменьскім сканзені ці церьков зо Збоя, котра є в сканзенї в Бардеёвскых купелях.

 

Образы не продавав

Свої образы не продавав. Даровав їх понад тісяч. Суть в пріватных збірках в Братїславі, Кошіцях, Снинї, Гуменнім і околіцї. Ёго творы попутовали і до Белґії, Нїмецька, США ці Чеськой републікы.

Выствка Юрія Мацана буде в просторах каштелю в Снинї приступна од 15-го новембра 2019-го року до 25-го януара 2020-го року. Святочна вернісаж одбуде ся 28-го новембра о 17.00 год.