13. 11. 2019: Буковскый стрїтив ся з представителями меншын Босны і Герцеґовины

Уповномоченый влады Словацькой републікы про народностны меншыны Ласло Буковскый (на фотцї всерединї) прияв у віторок, 12-го новембра 2019-го року, Франя Ровера, председу Союзу народностных меншын в Републіцї Сербскій і Маю Кременовіч, председкыню Рады про народностны меншыны в Републіцї Сербскій.

О приятю делеґації заступаючой народностны меншыны з Босны і Герецеґовины інформовав офіціалный сайт уряду уповномоченого.

 

Порадный орґан парламенту

Як написав Ласло Буковскый на своїм офіціалнім сайті на сіті Facebook, по стрїчі з Франём Ровером і Маёв Кременовічовов мусить конштатовати, же дакотры елементы народностной політікы можуть быти хосенны і про Словацьку републіку.

Союз є неполітічным здружінём обчанів, котре має Републіков Сербсков удїлену позіцію здружіня з окремым публічным інтересом. Рада має законом встановлены компетенції. Є порадным орґаном Народного згромаджіня в Републіцї Сербскій (парламенту). Задачов є слідовати леґіслатівны і іншы приписы в области охраны прав членів народностных меншын, як і партіціповати на задачах Народогно згромажіня в Републіцї Сербскій і сполупрацовати на вшыткых уровнях властей в Боснї і Герецеґовинї, а і з меджінародныма інштітуціями.

 

Познакомили ся зо сітуаціёв на Словакії

Буковскый делеґацію інформовав о сітуації народностных меншын на Словакії і познакомив їх о досягненых резултатах при аплікації меншыновых прав.

Навщіва з Републікы Сербской за інформаціями офіціалного сайту уряду уповномоченого оцїнила главно партіціпацію штатной справы і народностных меншын у Выборі про народностнны меншыны і етнічны ґрупы, як і вытворїня Фонду на підпору културы народностных меншын.

Так само делеґація інформовала і дала комплексный образ о правах народностных меншын в Републіцї Сербскій, і о сітуації меншын в другій части федерації. Наперек складній і у великій мірі непровидній сістемі, дакотры законом ґарантованы права і вырїшуючі механізмы можуть быти подля Буковского прикладом і про приготовлёваный закон о народностных меншынах на Словакії.

В рамках федерації Босна і Герцеґовина суть узнаны італійска, україньска, русиньска, албаньска, жыдївска, словацька, словіньска, македоньска, ромска, австро-нїмецька, чеська, чорногорьска, мадярьска, польска, російска, турецька і румуньска меншына.

Петро МЕДВІДЬ, ЛЕМ.фм