13. 10. 2023: Юрко ХАРИТУН: Треба співати, Буде так, Не забывай, Друга любов (Стишкы)

Юрко Харитун

ТРЕБА СПІВАТИ

І віршы треба

в почливости мати

Доволити їм лїтати

Коли потїшать

лем єдного чоловіка –

буду їх писати.

Просять ся до рядків слова

хотять штось там найти

Выйти із них рімованы

як співы пташок із гнїзда

Кілько красы є на світї

Лем треба співати о любви

 

 

БУДЕ ТАК

Почекам,

штоскоро вітор

оджене хмару

На Місяць сяду

Має кантарь і сідло

Відїти хочу наше село

То мої сны

мої надії

якы пригорнути хочу

до моїх віршів

Може прийти і буря

Стане ся штось і таке

Місяць аж на поріг

занесе мене домів

Почекам,

над селом сонце скоро выйде

І буде так як я хотїв

 

 

НЕ ЗАБЫВАЙ

Прийде пекло

а ты грай, співай

І увидиш

буде рай

Тілько мелодій на світї

Співай і грай

Поможуть і соловї тобі

Не забывай

            Забудеш на зло

            Гуслї поможуть тобі

            Спід стрїхы выгнати ёго

 

 

ДРУГА ЛЮБОВ

Заведу тя там

де я колись жыв

До школы ходив,

Зберав ягоды, малины

І на тот край,

про мене рай не забыв

Теперь лем сниє ся менї

А я бы так хотїв

вернути ся домів

Іщі раз пережыти

і чути над колысков спів

моёй мамкы і нашых Русинів

Заведу тя там,

пережыєме з тобов

і другу любов