12. 9. 2017: На юбілей міста прийдуть пряшівскы родаци

Місто Пряшів вєдно із многыма пряшівсткыма інтітуціями з нагоды 770-ой річніцї од першого писомного документу о містї (тот ся датує 7-го новембра 1247 р.) уж зорґанізовали у тім роцї многы інтересны културно- освітнї події. Є красне, же при тім місто не забывать і на свій мултікултурный характер, на многонародностне зложіня свого жытельства. Хосенны події, присвячены народностным меншынам у Пряшові під назвов І мы сьме Пряшів, недавно приготовив у своїх парадных просторах палаца Ракоція Крайскый музей у Пряшові. В рамках тых подій представили свою історію і културу ай Русины.

 

Концерт родаків зачне А. Мачошкова

 

Далшу велику подію на свій юбілей готує місто Пряшів на септембер т. р. Тов великов подіёв буде Концерт родаків, котрый буде на пряшівскім амфітеатрї днесь, 12-го септембра 2017. На концертї, окрем многых пряшівскых музичных ґруп, пряшівскых родаків выступлять і нашы люди. Як інформовала говоркыня міста Вероніка Кметоні Ґаздова, на концертї ся представлять і ґратуланты, котры ся вернуть до родного міста. Вступ на концерт буде бесплатный. Ґратулантами будуть родаци такзваного словацького „Liverpoolu“, знамы з різных областей културно-сполоченьского жывота, театру, музикы і філму.

Зачаток проґраму є напланованый на 18.00 годину выступлїнём Марькы Мачошковой, пряшівской, але і нашой найзнамішой особности културного жывота Русинів. Выступлять і музичны ґрупы „Mloci“ і „Hrdza“, але і Михаелла Папп, Едо Клена і Анді Белей.

 

Ґалаконцерт буде модеровати М. Гудак

 

Од 20.00 год. зачне ґалапроґрам, котрый своїм выступлїнём одкрыє леґенда словацького джезу Петер Липа. Ґалапроґрам буде модеровати далшый популарный Русин і родак із Пряшова – Михал Гудак. Міджі ґратулантами буде і наш професіоналный Підддуклянькый умелецькый народный субор, фоклорный колектів „Šarišan“, пряшівска співачка Катка Кощова, „AMC Trio“, „Komajota“, „Helenine oči“ i далшы вызначны особы, як герцї Юрай Кукура, Боріс Фаркаш, Мілка Зимкова, Стражановцї, Ґабіка Марцінкова, співачка Катка Кнехтова, шпортовый коментатор Марцел Мерчіяк, співак Петер Надь ці Іґор Дротар – знамый з автомобіловых змагань. Святочный вечур зо своїм выступлїнём завершыть єдна з найуспішнїшх музичных ґруп на Словакії – „IMT Smile“.

ПРИДЬТЕ МНОГЫ, НЕ ОБАНУЄТЕ!

 

-акуз-