12. 7. 2024: Майже міліон евр піде до словацько-польского приграніча

Майже єден міліон евр піде до словацько-польского приграніча на проєкты в области турізму. Кінцём юна то в польскім Ряшові схвалив Комітет про малы проєкты в рамках Фонду малых проєктів Проґраму Interreg Польща – Словакія 2021 – 2027, котрого справцём є Здружіня Еврореґіон Карпаты.

Як інформовало Оддїлїня комунікації Пряшівского самосправного краю (ПСК), схваленых было затля 15 малых проєктів, котрых партнерами суть і орґанізації ці інштітуції з ПСК. На словацькім боці граніці проінвестує ся майже 500 тісяч евр.

Єдным із схваленых проєктів є замір Крайского музея в Пряшові з польскыма партнерами – Окружным музеём в Новім Санчу і Окружным музейом в Ряшові, котры хотять вєдно ожывити кралёвску обходну путь Via regalis.

Грошы підуть і до русиньскых реґіонів. Народный парк Полонины быв успішным жадателём в проєктї Скарбы природы і културы Выходных Карпат, місто Меджілабірцї дістало схвалїня на проєкт По слїдах 1-ой світовой войны. Далшы проєкты має наприклад і місто Бардеёв ітд.

Проєкты были схвалены в рамках першой вызвы на передкладаня малых проєктів в рамках пріоріты 3 з назвов Креатівне і турістічне приграніча. Оправданыма жадателями были з боку ПСК окресы Гуменне, Меджілабірцї, Пряшів, Сабінів, Снина, Стропків, Свідник і Воронів над Топлёв.

Кінцём місяця юл будуть схвалёвати ся далшы малы проєкты з той самой пріоріты, де справцём Фонду малых проєктів є Европске зґрупованя теріторіалной співпраці ТАТРЫ. Оправданыма жадателями будуть із ПСК наприклад окресы Бардеёв, Кежмарок, Левоча, Попрад, Стара Любовня.

Петро МЕДВІДЬ, ЛЕМ.фм, языкова і ґрафічна управа: АРК в СР.