12. 7. 2016: На бывшім боёвім полю в Гостовицях є нова дзвоніця
„Унікатный проєкт дзовніцí на боёвім полю І. світовой войны ся ближыть до фінале,“ інформує на своїм фейсбуковім фанпейджі Клуб воєньской історії Бескиды (Klub vojenskej histórie Beskydy), котрый інціовав роботы в русиньскім селї Гостовицї, на теріторії історічных боїв Карпатьской фронты в роках 1914 –1915.
Почас І. світовой войны коло села Гостовицї проходили тяжкы бої. Головно в апрілю 1915-го року почас Великоднёй битвы в Карпатах на берегах над селом проходили бої, котры собі выжадали тісячі мертвых і далшы тісячі раненых людей. Проти собі в тім просторї боёвали австро-угорьска і російска армады. В австро-угорьскій армадї были тых боїх участны і реґіменты, котры реґрутовали вояків із теріторії днешнёй Словакії. Бої над Гостовицями собі так выжадали і жывоты нашых предків, інформовує далше Клуб воєньской історії Бескиды.
Думка збудовати дзвоніцю выникла у 2015-ім роцї. Втогды клуб орґанізовав турістічный поход на місця тых боїв. Почас походу выникла думка збудовати на полю боя дзвоніцю, котра буде припоминати смерть множества вояків, котры там загынули. Проєкт за інформаціями клубу міг быти зреалізованый дякуючі ентузіазму дакілько фундаторів і завдякы добровольникам, котры помагали з роботами. В суботу 9-го юла 2016-го року была дзвоніця змонтована на своїм місцї. Цїлый проєкт збудованя дзвоніцї мав стояти коло 10 тісяч евр.
„Чекать нас іщі управлїня підставця і околіцї. В лїтї 2016-го року плануєме святочне одкрытя. Ку дзвоніцї поведе научна стежка, котра буде присвячена якраз темі насаджіня вояків із теріторії днешнёй Словакії на Карпатьскій фронтї 1914 – 1915,“ закінчує інформацію Клуб воєньской історії Бескиды.
Клубу ся у тім селї вже подарило обновити войновый цінтерь. Свої роботы клуб фінанцує головно з рїзных дарів, сістематічно жадають дотації формов ґрантів. Великов помочов про клуб суть і фінанції здобыты асіґнаціов двох процент з дани.
Добровольницькы міджінародны таборы, в рамках котрых ся зачало робити і на дзвоніцї в Гостовицях, орґанізує Клуб воєньской історії Бескиды уж од 2011-го року. На них брало участь уж дакілько десяток людей із Словакії, Мадярьска, Польщі, Чеськой републікы, Румунії і Словіньска, котры одробили тісячкы годин, бо їх інтересує історія. У тім роцї мать клуб напланованы штири такы таборы.
„В рамках того сьме зачали і з обновлёванём войнового цінтеря з І. світовой войны у Велькропі (в окресї Стропков, позн. редакції), котрый оправляме уж дакілько років. Є то тяжке, бо іде о найвекшый цінтерь із І. світовой войны на Словакії,“ увів недавно про словацьку державну пресову аґентуру TASR председа клубу Мартін Дробняк з тым, же там є поховано 8 662 вояків.
Клуб воєньской історії Бескиды ся занимать баданём подій І. світовой войны і ініціовав основаня вышеградьской робочой ґрупы про старостливость о войновы цінтерї, котра соєдинять обчаньскы здружіня із середнёй Eвропы, котры присвячуть свій час старостливости о тоты пєтны місця.
Жрідло фотоґрафії: Klub vojenskej histórie Beskydy.
П. М.
