12. 4. 2019: Оцїнили календарь із деревяныма церьквами, котры суть главно русиньскы

  • Єдна із деревяных церьковцей у селї Міроля, котрa є в оцїненім календарю, котрый выдав Пряшівскый самосправный край. Жрідло: po-kraj.sk/Мілан Ноґа.

    Єдна із деревяных церьковцей у селї Міроля, котрa є в оцїненім календарю, котрый выдав Пряшівскый самосправный край. Жрідло: po-kraj.sk/Мілан Ноґа.

Пряшівскый самосправный край у катеґорії Реґіоны 27-го річника конкурзу Найкрасшый календарь Словакії (Najkrajší kalendár Slovenska) здобыв друге місце за настїнный календарь Деревяны церьковцї Пряшівского краю 2019 (Drevené kostolíky Prešovského kraja 2019). В календарю суть і менше знамы церькви на фотоґрафіях Яна Штовкы.

До конкурзу словацькой календаровой творчости о Найкрасшый календарь Словакії приголосили свої творы авторы, фірмы, міста, села і краї. В складї пороты были высокошкольскы педаґоґы, фотоґрафы і новинарї. Довєдна оцінёвали 45 настїнных і столовых календарів од 33 выдавателїв.

В календарю ПСК Деревяны церьковцї Пряшівского краю 2019 суть церькви з 18. стороча в Шеметківцях, Миролї, Прикрой, Мікулашовой, Доброславы, Яловой, Новоселіцї, Потічках, але і церьковця із другой половины 17. Стороча в Будружалї, котра є записана меджі світовы културны памяткы UNESCO,“ інформовала говоркыня ПСК Даша Єленёва.В календарю находять ся і фотоґрафії церьквей із Матисовой і Новой Полянкы, котры днесь стоять в сканзенах у Старій Любовнї і у Свіднику.

Вєдно з выслїдками конкурзу Найкрасшый календарь Словакії 2019 были оцїнены в рамках 12-го річника конкурзу Найрасша книжка і пропаґачный матеріал Словакії за рік 2018 (Najkrajšia kniha a propagačný materiál Slovenska za rok 2018). Спомеджі 19 приголошеных публікацій зась были успішны і выдавателї з Пряшівского краю. Місто Стара Любовня здобыло оцїнїня за дві публікації. Першов є книжка  Стара Любовня – реґіон многых култур на граніцї Спіша і Шаріша (Stará Ľubovňa – región mnohých kultúr na rozhraní Spiša a Šariša). Найдеме в нїй і профілы русиньскых сел той области з  фотоґрафіями. Другов публікаціёв є Календарь културных, шпортовых і сполоченьскых подій (Kalendár kultúrnych, športových a spoločenských podujatí).

„Пряшівскый самосправный край здобывать в цїлословацькім конкурзї найкрасшых календарїв першы місця уж реґуларно. Од 2008 здобыв року шість першых місць і три другы місця. В конкурзї найкрасшых книжок і пропаґачных матеріалів у попереднїх річниках быв оцїненый вже вісемраз,“ інформовала говоркыня ПСК. Святочне выголошіня резултатів конкурзів проходило 9. апріля 2019 в Баньскій Быстріцї.

-аз-, жрідло: Korzar Prešov

Script logo