12. 4. 2016: Москаль дав до суду закарпатьскый референдум із 1991-го року

Ґеннадій Москаль, ґубернатор Закарпатьской области Україны жадать од суду, жебы были резултаты референдума із 1-го децембра 1991-го року незаконныма. В рефенредумі ішло о признаня Закарпатьскій области статус автономії в складї Україны. Інформує о тім „Українська Правда“.

Москаль ся подля інформацій порталу обернув на Окресный суд. Окрем того хоче зрушыти односны резултатам референдума рїшіня Закарпатьской обласной рады.

„Сам референдум у 1991-ім роцї быв в части признаня области окремого статусу незаконным. Він прямо протиречів тогдышнёму Закону Україны „О всеукраїнькім і містнім референдумах,“ повів Москаль. Продовжовав, же зміны до Конштітуції може внести лем векшына у Верьховній радї Україны, зато резултаты референдума не мали і не мають жадной юрісдікічной силы.

Москаль выступать в цїлій кавзі як „патріот“. Говорить, же кідь нихто із патріотів за 25 років не рїшыв судом референдум, подля ёго слов іншпіроване КҐБ і комуністами, котры лем хотїли дестабілізовати сітуацію на Українї, буде то зроблене ним. „По рїшіню суду резултат референдуму буде мож шмарити на смітник історії Закарпатя,“ додав ґубернатор.

Припоминаме, же 5-го апріля 2016-го року посланцї Закарпатьской областной рады у своїм выголошіню так само одкликавали ся на референдум із 1991-го року. Веце ся о тім можете дочітати ту.

P. M. , фотоґрафія: sharij.net