12. 3. 2021: Свідник од зачатку року минув уж 21 тісяч евр в повязаню з пандеміёв

Місто Свідник минуло од зачатку року на протипандемічны рішіня і тестованя на хвороту COVID-19 приблизно 21 тісяч евр. Грошы, котры місту має рефундовати держава, хоснують наприклад на накупліня респіраторів.

„Дотримуєме в містї вшыткы гіґієнічны наряджіня, школы затля зохабляме отворены,“ повіла про аґентуру TASR пріматорка міста Свідник Марцела Іванчова з тым, же условія в школах ставають стогішыма.

„Ідеме до дезінфекції, такой як то хвиля доволить. Вшыткым жытелям старшым як 65 років сьме накупили і роздістрібуовали респіраторы,“ інформовала Іванчова.

Свідник є в бордовій зонї на мапі Словакії, люде там потребують каждых сім днїв резултат антіґенового тесту. „Кедьже не каждый має можность дати ся отестовати почас тыждня, або ся не дістане до сістемы обїднавок на тест, зряджуєме і надалше нашы місця на тестованя.“ Подля пріматоркы то складна задача, бо місто не має оддїлїня крізового ряджіня і так цїлу орґанізацію тестованя забезпечують урядници, котры почас тыждня роблять на містьскім урядї свою звычайну роботу і через вікенд забезпечують то, што треба ку тестованю.

Цїлковы вытраты на протипандемічны крокы включно тестованя суть про місто од зачатку року приблизно 21 тісяч евр.

„Што дотулять ся, наприклад, накуплїня респіраторів про жытелїв, намагаме ся купити їх з дотації од державы, котру дістанеме на мобілне одберове місце (місце тестованя, позн. ред.). То значіть же і мобілны одберовы місця маме намагу робити барз економічно так, жебы сьме не доплачали з розрахунку міста. Не каждый вікенд ся то подарить,“ пояснила пріматорка.

Свідник нукать і можность накуплїня потравин, гіґієнічных потреб, ці забезпечіня лїків про сеніорів над 65 років, і про здравотно зневыгодненых жытелїв. Каждый, хто поміч потребує, може обернути ся на містьскый уряд.

Петро МЕДВІДЬ, ЛЕМ.фн, языкова управа: ред. АРК в СР.

Script logo