12. 12. 2019: Людмiла Шандалова здобыла перше місце в літературнім конкурзї

12-го децембра 2019-го року проходило в просторах Consillium maius Пряшівской універзіты в Пряшові святочне выголошіня 6-го річника Літературного конкурзу Марії Мальцовской за найлїпшы творы в области  поезії, прозы, есеїв і драмы в літературнім русиньскім языку.

Перше місце в конкурзї, котрый орґанізує Сполок русиньскых писателїв Словеньска, тот рік здобыла зо своёв поезіёв вже знама русиньска писателька Людмiла Шандалова.

Двоми дебутанты

Тот рік ся до конкурзу залучіло довєдна девять авторів, котры загнали свої творы в розсягу 10 аж 20 сторінок (дотеперь непублікованого тексту). Творы пришли з области поезії і прозы.

Журї, котра была в складї Михал Павліч, Аліца Вєтошевова і Кветослава Копорова, оцінёвала тексты Мілана Ґая, Штефана Смолея, Елены Хомовой- Грінёвой, Меланії Германовой, Миколая Ксеняка, Юрка Харитуна, Людмiлы Шандаловой, но потішуючім фактом є, же были і двоми дебутанты.

Із своёв прозов, повіданями про дїти, ся першый раз представила Марія Шмайдова а під псевдонімом ся до конкурзу залучіла і Вєра Горішня, котра загнала дїтячі стишкы.

Перше місце про Шандалову

Меджі оцїненыма в конкрзї была і дебутантка Марія Шмайдова, котрій журі уділило третє місце. На другім місцї із своїма стихами скінчів Юрко Харитун. З новов поезіёв конкурз выграла Людмiла Шандалова.

Людмiла Шандалова (1964 р.) має дотеперь выданы три книжкы. Збірку дїтячіх стишків Подьте, дїти, што вам повім (2014 р.), прозу Червеный берег (2016 р.) і далшу збірку поезії про дїти під назвов Ани бы сьте не вірили (2018 р.). Окрем того, написала пять театралных дїтячіх пєс.

У 2015-ім роцї дістала за свій дебут Премію Александра Духновіча за русиньску літературу. У 2017-ім році за прозу Червеный берег уділив їй словацькый Літературный фонд Ціну Александра Павловіча. В Ліетературнім конкурзі Марії Мальцовской брала дотеперь участь трираз, двараз была друга і раз третя.

Петро МЕДВІДЬ, ЛЕМ.фм