12. 12. 2017: В Пряшові закінчать Рік Адолфа Добряньского
18-го децембра 2017-го року в Пряшові офіціално закінчать святочнов подіёв – юбілейный Рік Адолфа Добряньского. Юбілей, котрый быв выголошеный Округлым столом Русинів Словеньска, проходив із нагоды 200-ой річніцї од народжіня того вызначного русиньского політіка і реформатора.
Події были почас цїлого рока
В рамках Року Адолфа Добряньского окремы русиньскы орґанізації присвятили свої події якраз тій вызначній історічній особности. Актівности і події присвятило юбілею, наприклад, Общество св. Йоана Крестителя, котрого член отець Мілан Ясик, ґрекокатолицькый парох в Ольцї, выдав і книжну публікацію під назвов Адолф Добряньскый, вызначный репрезентант Русинів 19. столїтя.
Єдиный у світї професіоналный русиньскый театер вернув до свого репертоару із нагоды юбілейного року пєсу словацького драматіка Карола Горака Адолф Івановіч Добряньскый – Зоря на небі, над головов штранґ. Обновлена премєра той історічной інсценації проходила в місяцї марец. І найстарша, а єдночасно і найвекша, русиньска пореволучна орґанізація – Русиньска оброда на Словеньску, пририхтовала в тім роцї події, котры были присвячены Добряньскому. Мож спомянути, же цїле тогорічне святкованя Дня Русинів, котре проходило в місяцї юн, было якраз в дусї юбілею. Русиньска оброда навеце тот рік першыраз орґанізовала День Русинів у співпраці із далшыма русиньскыма орґанізаціями, із котрых кажда своїм дїлом придала на якости цїлых святковань. До святкованя юбілею залучіли ся і далшы орґанізації, мож спомянути, наприклад, молодежне обчаньске здружіня молоды.Русины.
Округлый стіл Русинів Словеньска передав у юбілейнім роцї памятну плакету Петрови Трохановскому, вызначному русиньскому діятелёви із Лемковины. Тота плакета была передана як унікатный оріґінал, на котрім є выображене лоґо Року Адолфа Добряньского.
Закінчіня юбілею з одкрытём памятной таблы
Русины стрітять ся в понедільок 18. децембра 2017 в просторах Руського дому, котрый находить ся в центрї міста Пряшів. Якраз там буде святочно одкрыта памятна табла Добряньскому. Тым ся із боку Округлого стола Русинів Словеньска офіціално закінчіть юбілейный рік. Буде то якраз в день, коли ся Адолф Добряньскый перед 200 роками народив. Подія закінчіня юбілею зачне ся одкрытём таблы о 14.00 год., потім буде слїдовати і куртый сполоченьскый проґрам.
В тот самый день дасть свій вклад ку закінчіню Рока Адолфа Добряньского і Матиця словацька. В просторах Театру Александра Духновіча на 10.00 год. приготовлює святочну академію, в рамках котрой буде мож выслухати лекції о Добряньскім, но хывовати не буде ани фолклорный проґрам.
Святковати ся буде і рік 2018
Рік Адолфа Добряньского кінчіть, но русиньска платформа уж оголосила, же святковати ся буде і рік слїдуючій. В роцї 2018 собі хоче Округлый стіл Русинів Словеньска своїма актівностями припомянути 100 років од выникнутя сполочной державы Чехів, Словаків і Русинів – 1-ой Чехословацькой републікы. Тыма актівностями хотять єдночасно Русины вказати на то, же в републіцї Масаріка не были лем народностнов меншынов, але
державотворным народом.
П. М.
