11. 9. 2024: В Будапештї одбуде ся конференція на честь професора Удварія
Бібліотека Русинів Мадярьска імени професора Іштвана Удварія в Будапештї, котра тот рік святкує 20-ый юбілей свого основаня, орґанізує у своїх просторах в четверь, 12-го септембра 2024-го року, памятну конференцію на честь професора, по котрім має свою назву.
На конференції будуть брати участь Віктор Крамаренко – председа Вседержавного русиньского самосправованя, під котре бібліотека належыть, і Віра Ґіріц – посланкыня за Русинів у Парламентї Мадярьска.
На конференції участны будуть годны выслухати штири лекції. Ілдіка Поланскіне Надаш, ведуча Бібліотекы Русинів Мадярьска імени професора Іштвана Удварі, одпрезентує 20 років інштітуції і їй цїнности. Анна Ланґне Бенедек Штумф буде бісїдовати о основаню бібліотекы.
Русиньскый лінґвіста Михаіл Капраль буде в лекції занимати ся особов проф. Др. Іштвана Удварія, котрого быв колеґом на высокошкольскій русиністіцї в Ніредьгазї. О етноґрафічных конспектах дїятельства Іштвана Удварі буде бісїдовати Дюла Віґ.
Славіста і педаґоґ Іштван Удварі (14. юла 1950 р. – 9. новембра 2005 р.) быв родаком із села Торнёшпалца в Мадярьску. У 1975-ім роцї закінчів Універзіту Лайоша Кошута в Дебрецінї, доктором філозофії быв од 1986-го року. Професуру здобыв у 1995-ім роцї. Од року 1997 быв членом Мадярьской академії наук.
Удварі од 1982-го року выкладав російскый, україньскый і русиньскый язык на Высшій педаґоґічній школї в Ніредьгазї, де у 1992-ім роцї засновав Катедру україньской і русиньской філолоґії, яка фунґовала до року 2013, пізнїше была обновлена лем україністіка.
Інтересовав ся аналізов русиньскых текстів, главно тых, котры односны суть ку періоду до 19-го столїтя, і котры ся му подарило найти в мадярьскых архівах. Окрем іншого приготовив до друку дакілько томів рукописів русиньского історіка Антонія Годинкы, репрітны выдань букваря Мануіла Ольшавского, букваря Іоанна Куткы і много далшых. Так само робив над языком і літературов Русинів Войводины.
Петро МЕДВІДЬ, ЛЕМ.фм, языкова і ґрафічна управа: АРК в СР.
