11. 8. 2020: В Літмановій припомянули собі 30-ту рочніцю од початку зъявінь
Почас вікенду, 8-го і 9-го авґуста 2020-го року, на горї Звір в русиньскім селї Літманова проходив одпуст, котрым собі духовенство і віруючі Пряшівской ґрекокатолицькой архієпархії припомянули 30-ту рочніцю од початку зъявінь Пресвятой Богородіцї. Інфомровав о тім Михал Павлишіновіч, говорця архієпархії.
Проґрам святкованя, котрый є каждый рік богатый, быв з причіны пандемічных рештрікцій коротшый і цілый одпуст быв тот рік лем на уровни парохії.
Присвячіня Богородіцї
Головна архієрейска літурґія одбыла ся в недїлю. Служыв єй архієпіскоп Іоан Бабяк, метрополіта Словакії і вєдно з ним служыв і Андрей Імріх, емерітный помічный єпіскоп Спішской дієцезы а приблизно двадцять священиків.
Проповідь мав отець Растіслав Бака, пряшівскый протопресвитер. „Перед 30-ма роками, ту на тім місцї Пресвята Богородіця Діва Марія ословить Іветку і Катку, жебы сьме мы на Словакії не стратили віру і не перестали ся молити. Дякуйме зато днесь за Матірь Марію, котру нам Ісус Хрістос подаровав на крестї, і котра нас все кличе: Мої дорогы діти,“ одзвучало у торжественній проповідї.
На кінцю архієрейской літурґії слїдовало присвячіня ся Пресвятій Богородіцї котре по короткых частях передчітавав владыка Іоан і священици вєдно із віруючіма ся ку нёму придали повторянём ёго слов.
Метрополіта у своїм приговорї на кінцю торжества припомянув, же святкованя того юбілею не кінчіть тым торжеством, але віруючі можуть все приходити на тото місце і здобывати так многы милости. Окремо поздоровив і візіонарьку Іветку, і подяковав єй, же шторік приходить на гору Звір і тым вказує, же і кедь єй жытя завело за граніцї Літманова і гора Звір має все місце у їй сердцї.
На одпустї співали і співачкы русиньскых народных і церьковных співанок Моніка Кандрачова і Анна Сервіцька. Головну літурґію, котра ішла і в прямім преносї на другім телевізнім окрузї верейноправной RTVS одспівав Хор святого Романа Сладкопівця.
Зъявіня іщі не суть офіціалны
Гора Звір є натеперь выголошена як офіціалне місце молитвы в Пряшівскій ґрекокатолицькій архієпархії. Зъвіня Пресвятой Богородіцї затля не были офіціално признаны Церьквов.
Перше зъявіня ся подля розповіданя дїтей мало одбыти пополїдне 5-го авґуста 1990-го року, коли ся грали на горї Звір. При граню ся зачули в лісі гукот, котрого ся острашыли і скрыли ся в близкім сіннику. Гукот не переставав і дїти мали чутя, же хтось ходить коло деревяного сінника.
Дїти – Івета Корчакова (11-рочна), Катарина Чеселкова (12-рочна) і Митько (9-рочный) ся зачали молити маріяньску молитву: Маріє, Мати наша, скрый на під свій плащ – і то трираз. Пізнїше повіли, же тоту молитву передтым не знали. О хвілю збачіли в сіннику світло, о котрім наперед думали, же то сонце. Світло перенесло ся над лавочку і у світлї збачіли красну панї, котра собі на лавочку сіла.
„Дня 5-го авґуста 1990-го року сьме мали єдину просьбу, жебы тота красна Панї ішла вєдно з нами (з горы Звір) долов до села, бо уж потемнїло і мы ся бояли іти лїсом самы. Красна Панї нам тоту просьбу сповнила,“ повіла о першім зъявіню візіонарька Івета.
Зъявіня мали одбывати ся аж до 6-го авґуста 1995-го року, Пречіста Дїва мала давати через візіонарїв посолства. Од початку ся на горї зачали сходити ґрупы людей. 11-го новембра 1990-го року вже з дозволїнём втогдышнёго пряшівского єпархы Іоана Гіркы была на горїі Звір служена літурґія. Поступно ся на горї зачало будовати велике путницьке місце. О найвекшый розвиток того місця постарав ся сучасный архієпіскоп Іоан Бабяк. Окремо про тото місце становив і священика, кедьже довтогды ся о гору Звір старав все парох Літмановой.
Петро МЕДВІДЬ, ЛЕМ.фм, языкова управа: ред. АРК в СР.
