11. 4. 2018: Вмерла русиньска поетка Любка Сеґеди-Фалц

10-го апріля 2018-го року добило сердце русиньской поеткы, актівісткы і учітелькы – Любкы Сеґеди-Фалц із Хорватії.

 

Народила ся 10-го апріля 1932-го року в Петровцях, на теріторії днешнёй Хорватії. Учітельску освіту здобыла в Осієку. Наперед учіла в Овчарах, потім короткый час робила в Міклошевцях і наконець довго жыла і робила в Дреновцях. На пензію одышла у 1988-ім роцї.

 

Писати поезію зачала вже як 18-річна. Їй перша збірка під назвов Подоба з далєка вышла у 1975-ім роцї і дргуга збірка під назвов Класки была надрукована в роцї 1999. Якраз за тоту збірку поезії здобыла у 2006-ім роцї Премію Александра Духновіча за русиньску літературу. Тітул лавреата і премія їй были переданы в Криницї почас IV. Бєнале русиньской/лемківской културы. Творы Любкы Сеґеди-Фалц были надрукованы і в різных часописах, ґазетах, календарях ці антолоґіях.

 

Любка Сеґеди-Фалц была єднов із основателїв і першов председкынёв дружства Руснак, три рокы была членом Світовой рады Русинів і так само была членом Світовой академії русиньской културы.

 

П. М.