11. 4. 2017: Кошіцї і Ужгород презентують сполочну дїдовизну

Десять телевізных інсценацій, сполочны інсценації в театрі  і документы о інтересных локалітах суть резуталтатом словацько-україньского проєкту під назвов Подорожуючі бабкы (Cestujúce bábky).

Цілём проєкту было злїпшыти інформованость о Кошыцькім краї і Закарпатьскій области Україны і презентовати сполочну културну дїдовизну. Інформовав о тім словацькый денник Korzár. Проєкт, до котрого были залучены і бабковы театры в Кошіцях і Ужгородї, зачав іщі у 2015-ім роцї з підпоров Норвеґжского фінанчного механізму. В четверь, 6-го апріля 2017, мав своє завершіня міджінароднов конференційов в Кошіцях.

В рамках проєкту зробило ся десять телевізных інсценацій, з котрых пять є на словацькы і пять на мотівы із Підкарпатя. Як повів про денник директор Бабкового театру у Кошіцых Павел Грегорчак, суть то повіданя, котры черьпали із леґенд і повістей, перевязаных із конкретным місцём у Кошіцькім краю або на Підкарпатю. Повіданя, котры были оброблены приповідково про дїтячу публіку, будуть одвысыланы іщі того року через Рождество в Словацькій телевізії.

Будуть із Спішского замку, рожнявской радніцї, медзевского гамру, кошіцькой Урбановой вежі і віняньского замку. Із Підкарпатя буде мож відїти інсценації очарівных гуслях, церькви, котра была збудована без єдиного клинця, о трёх сестрах на середняньскім замку, лампарёви із Ужгороду ці як выникли Карпаты.

Вєдно із інсценаціями будуть одвысыланы у верейноправній телевізії і телевізны документы презентуючі турістічны атракції на обидвох боках граніцї. Закарпатьску область Україны і Кошыцькый край будуть презентовати і коміксы, котры выходять із філмовых приповідок. Коміксы ся будуть представлёвати і в рамках чітательскых бісїд а будуть дістіброваны до бібліотек по цїлій Словакії.

Далшов актівностёв у рамках проєкту є сполочна театрална інсценація Чудотворьный балон, в котрій найдеме вшыткы спомянуты повіданя. Інсценація є в репертоарі Бабкового театру в Кошіцях, театру Бавка із Ужгорода, і вже почас минулорічной турістічной сезоны єй заграли в дакілько локалітах на обидвох боках граніцї.

Цїлковый розрахунок проєкту через Норвеґіжскый фінанчный механізм быв коло 654 тісяч евр. Пертнерами были окрем кошіцького бабкового театру і Кошіцькый самосправный край, Крайска орґанізація турістічного руху Кошіцькый край, Закарпатьскый академічный областный бабковый театер Бавка і Асоціація штудентів – економів Закарпатя АСЕЗ.

Жрідло фотоґрафії: bdke.sk

П. М.