11. 12. 2018: Ужгородьска духовна академія святкує 240 років

  • Днешня будова ужгородьской семінарії.

    Днешня будова ужгородьской семінарії.

13-го децембра 2018-го року одбуде ся в Ужгородї торежственный проґрам, котрым собі Мукачівска ґрекокатолицька єпархія припомяне 240-ту річніцю перенесеня духовной семінарії до Ужгорода.

Проґрам зачне на полудне Архієрейсков божественнов літурґіёв у старій семінарьскій каплічцї в Ужгородьскім замку, котру буде служыти мукачівскый єпарха, преосвященый владыка Мілан (Шашік). Святкованя буде продовжовати конференціёв, по котрій буде одслужена панахіда за вшыткых колишнїх настоятелїв, выхованцїв, основателїв, добродителїв і фундаторів духовной семінарії.

 

Заснована іщі в Мукачові

Днешня Ужгородьска ґрекокатолицька духовна академія імени блаженого Теодора Ромжы має свій початок іщі в Мукачові за часів єпіскопа Мануїла Ольшавского. Тот там у 1744-ім роцї засновав богословску школу.

Од 1778-го року школа зачала продовжовати своє діяльство в Ужгородьскім замку (позн. ред. АРК в СР: погляд на ґрафіцї злїва), котрый подаровала мукачовскому єпіскопови Андрійови Бачіньскому імператорка Марія Терезія. Школа была владыком Бачіньскым перетворена на духовну семінарію із штирирочным штудіём і дістала назву Трёх святителїв. У 1941-ім роцї дістала семінарія статус академії.

У 1949-ім роцї была ліквідована Мукачівска ґрекокатолицька єпархія комуністічныма властями, тым перервало ся і існованя школы. Ілеґално в роках 1956 аж 1991 закінчіло богословя 53 священиків.

Реліґійна свобода, яка пришла у 1989-ім роцї, дала можливости обновити і діяльство академії, котра в тім часї зачала діяти в Мукачови під веджінём ректора – владыкы Осифа (Головача). Єпархія в тім часї глядала можности збудованя новой академії, кедьже замок, де перед совєтьскыма влястями мала академія свій притулок, зістав у властницьтві державы.

У 1992-ім роцї єпархія здобыла фундуш на будованя при вступі до села Минай, коло Ужгорода. Академічный рік 1992 аж 1993 богословы вже штудовали в Ужгородí, хоць будова академії іщі не стояла.

У 2004-ім роцї почас першого святкоаня праздника Перенесїня мощей блаженого священомученика Теодора (Ромжы) кардінал Йозеф Томко із Рима посвятив докінчену будову новой семінарії і фундамент під ёго нову семінарьску церьков. У 2007 роцї владыка Мілан, мукачовскый єпарха, вєдно із кардіналом Теодором Еґаром Мак-Керріком, вашінґтоньскым архієпіскопом-емерітом, посвятив нову церьков коло богословской академії.

 

Штудовав у нїй і Духновіч

Школа, котру про богословів засновав у Мукачові Ольшавскый і пізнїше продовжовала своє діяльство в Ужгородї, была єдинов на теріторії втогдышнёй великой Мукачовской ґрекокатолицькой єпархії.

Хоць у 1818-ім роцї была заснована Пряшівска ґрекокатолицька єпархія, тота іщі довгый час не мала властну духовну семінарію. У Пряшові семінарію засновав аж владыка Николай Товт і была одкрыта 12-го септембра 1880-ім роцї. Такым способом іщі довгый час по одокремлїню Пряшова од Мукачова богословы із Пряшівской Руси ходили штудовати якраз до Ужгорода. Меджі нима і многы вызначны особности русиньской історії. З тых особностей не мож выхабити і двох будителїв, котры выходили ужгородьску семінарію. Были нима Александер Духновіч і Александер Павловіч.

Петро МЕДВІДЬ, лем.фм

Script logo