11. 12. 2018: З Фльоринкы до Явожна

При нагоді упамятнінь 100. річници фльориньского віче (позн. ред. АРК в СР: флориньска народна громада), якє дало початок Рускій Народній Республиці Лемків, делеґация з чужыны поклонила ся жертвам лаґру в Явожні.

Вертаючы з упамятнінь, якы проходили на Лемковині в суботу, 8. грудня/децембра 2018 р., делеґация Стоваришыня Лемків вєдно з участниками выізду поклонила ся при лемківскым памятнику вязнів тортуруваных і страдавшых в Центральным Лаґрі Працы в Явожні.

До лаґру зрыхтуваного специяльно для выселяных в рамках акциі «Вісла» трафляли м.ін. Лемкы, котры были катуваны в тій комуністичній вязници, яка перше была філийом гітлерівского лаґру, знаного в цілым світі як німецкій концетрацийний лаґєр Аушвіц.

Поклін предкам оддали м.ін. члены Головного Заряду СЛ, на челі з предсідательом Андрийом Копчом. Памятник страдавшым Лемкам в Явожні был одкрытий влони, 29. квітня/апріля 2017 р., вчас центральных упамятнінь 70. річниці выгнаня.

Севериян КОСОВСКЫЙ. лем.фм, фот. Мирослав Воргач

(Публікуєме в оріґіналї – лемківскім варіантї русиньского языка.)