11. 1. 2017: Представителї „OSCE‟ інтересують ся Русинами

До Закарпатьской области Україны бы мали в найблизшім часї прийти представителї Орґанізації про беспеку і спoлупрацу в Европі (Organization for Security and Co-operation in Europe, OSCE). Інформує о тім україньскый інтернетовый портал «Новини Закарпаття».

 

Представителї OSCE бы мали Закарпатьску область Україны навщівити, жебы пробадали проблем узнаня Русинів на Українї. Подля неофіціалных інформацій, котрыма має діспоновати портал, Европа має быти знепокоєна тым, же русиньска тема може дестабілізовати сітуацію на европскій граніцї.

Портал припоминать, же Русины суть в іншых державах світа вызнаны, і же Орґанізація зъєдиненых народів рекомандовала Русинів узнати і Українї. Так само статя припоминать, же вопросы народностных меншын суть в Европі пріорітныма.

 

Підкреслюєме, же русиньскы орґанізації, котры досправды діють на Українї, ниґда не мали інтерес дестабілізовати сітуацію в Закарпатьскій области Україны, ниґда не говорили о будьякых актівностях, котры бы мали нарушыти теріторіалну цїлость Україны. Русины на Українї, єднако як і Русины в іншых державах світа, суть мірныма і законопослушныма жытелями своёй державы. Вєдно з тым але вказують на порушованя їх прав од 1991-го року. О дестабілізації і сепаратізмі суть обвинёваны україньскыма медіями, русиньскыма нежычливцями і самым київскым естаблішментом.

 

Орґанізація про беспеку і сполупрацу в Европі є міджінароднов беспечностнов орґанізаціов, котра выникла тренсформаціов Конференції о беспецї і сполупраці в Европі в 1995-ім роцї. OSCE має 56 участницькых держав Европы, Середнёй Азії і Северной Америкы. Цілём членьскых держав є підпора і розвиток демократічной сполочности решпектуючой людьскы права і основны свободы, превенція локалных конфліктів, обновлёваня міру во войновых областях, просаджованя колектівной беспекы, забеспечіня соціалной справедливости і охрана жывотного оточіня.

 

П. Медвідь

Script logo