10. 9. 2024: Одбыла ся членьска громада Руського клубу 1923. Од Руського дому далше не має ключі

Руськый клуб 1923 припустив і мімосудный договор.

В четверь, 5-го септембра 2024-го року, одбыла ся в Пряшові членьска громада єдной із найстаршых фунґуючіх русиньскых орґанізацій на Словакії – Руського клубу 1923. Членьску громаду на oснові станов і рїшіня Выконного выбору скликав председа орґанізації Федор Віцо (на фотцї в центрї).

На громаду, котра мусила быти „в гостях“, в рештаврації Baltic, пришло понад 70 процент членів Руського клубу 1923. Почас засїданя голосовало ся і о приятю новых особ, котры проявили інтерес о членство в орґанізації.

Потїшуючім фактом є, же покликаны были вшыткы членове Руського клубу, кедьже в попереднім періодї председам, наперед Анні Ґалёвій, пак Феодорови Віцови, хыбили комплетны спискы од бывшого довгорічного председы Гавриїла Бескида, што ся теперь подарило скомплетізовати.

Членове дістали інформацію о дїятельстві і господарїню

Почас членьской громады участны могли выслухати інформацію о дїятельстві Руського клубу 1923 за рокы 2022 і 2023, яку прочітав Федор Віцо, а пак і Справу контрольной ревізной комісії, котру прочітав председа комісії Станіслав Конечный.

Хоць, як было і чітане в окремых інформаціях, суд уж давнїше дефінітівно вырїшыв, же єдинов леґалнов орґанізаційов з назвов Руськый клуб 1923 є орґанізація, котру веде як председа Федор Віцо, орґанізації дотеперь не подарило ся здобыти приступ до Руського дому.

І кедь проходили в данім періодї засїданя Выконного выбору, веджіня Руського клубу 1923 концентровало ся главно на тоту проблему, жебы правнов путёв знова здобыти приступ ку маєтку, о котрый бы ся орґанізація мала старати, і кедьже якраз на тот цїль была в 1923-ім роцї основана, жебы была господарём Руського дому, покля Общество імени Александра Духновіча буде в нїм робити културно-общественне і освітнє дїятельство.

Руськый клуб 1923 вдяка тому, же іщі все є без своёй будовы, не міг зозвивати жадне інше діятельство, а в данім періодї не мав ани властный банковый рахунок.

Членьска громада на кінцю заголосовала за план дїятельства і розрахунок на рік 2024. Членове были згодны, жебы Руськый клуб 1923 зробив властный банковый рахунок, і встановило ся членьске в сумі 5 евр на рік.

Секерак вмер, но Руськый дім не маєме

Кавза коло Руського дому в Пряшові ся тягне уж майже 20 років. Спор почав у 2005-ім роцї, коли Штефан Секерак скликав „членьску громаду“ Руського клубу 1923, на котрій не были участны досправдовы членове той орґанізації, але новы люде, і зохабив ся зволити за председу.

На єднім боцї „Секераковцї“, на другім боцї „Бескидовцї“, під веджіньом Гавриїла Бескида, почали довгы судны споры о то, котра орґанізація є леґална. Но Секерак, котрый ся ку будові дістав нелеґално, із своїм „Руськым клубом 1923“, наперед змінив становы орґанізації, і у фебруарї 2006-го року основав Фундацію Руського клубу 1923, на котру перевів маєток – будову Руського дому.

Будова, на котру зберали грошы од 1923-го року русиньскы інтелектуалы, еміґрація в Споєных штатах Америкы, але і простый народ по селах, і котра мала служыти, а і служыла як народный дім, так зістала заперта і служыла про узкый округ людей коло Штефана Секерака, якый там не допустив ани русиньскы події, аж на пару вынятків, ани жебы там могли мати свої просторы русиньскы орґанізації.

Днесь уж Руськый клуб 1923, котрый моментално веде Федор Віцо, має в руках документы, котры свідчать о тім, же якраз тота орґанізація є єдина леґална. Но і кедь тото было потверджене державныма орґанами пару років тому, до будовы ся Руськый клуб 1923 далше не дістав, бо Руськый дім є, за поглядами державных орґанів, маєтком Фундації Руського клубу 1923. Секерак, котрый быв справцём фундації, так далше „ґаздовав“ на русиньскім народнім маєтку.

Початком 2024-го року Штефан Секерак вмер. Председа Віцо докінця мав пару днїв ключ од главной браны, не од далшых просторів, но наконець знова зістав без приступу до будовы. Замок быв выміненый.

У фебруарї 2024 уж быв зареґістрованый на Міністерстві внутрішніх справ Словацькой републікы новый справця фундації – Штефан Секерак молодшый, сын попереднёго справцю. Руськый клуб 1923, котрый мав быти зряджователём фундації за часів Секерака, поважує тоту зміну у функції справцю за неплатну. Выконный выбор орґанізації на єднім із своїх засїдань, у януарї того року, докінця мав властну номінацію на справцю фундації.

Но фактом є, же і далше Руськый клуб 1923 і ёго членове не мають приступ до будовы, і Руськый дім, так як за попереднього справцю, зістав запертый про Русинів, і вобще. Міністерство, котре бы в тім могло вырїшовати, дає од рїшіня рукы гет, на што уж мож было привыкнути при державных орґанах в тій справі за майже 20 років боя за народный маєток.

Членьска громада прияла можливы рїшіня

О тім, як бы ся далше могла рїшыти проблема Руського дому, была якбач найдовша діскусія на членьскій громадї. Наконець было прияте узнесїня, котре має што до проблемы будовы штири пункты.

Членове Руського клубу 1923 дали Выконному выбору задачу выбрати адвоката, котрый подасть на суд дїла в справі того, жебы было переведжіня маєтку на фундацію выголошене за неплатне, і жебы ся встановило, хто має права властника.

Выконный выбор так само дістав од членів орґанізації мандат, жебы ініціовати і вести переговоры з Фундаціёв Руського клубу 1923, з цїлём закінчіти спор мімосудно. Значіть, покля бы Руськый клуб 1923 здобыв контролю над будовов.

Выбор має так само од членів повірїня, жебы ініціовати крокы на зрушіня фундації міністерством або судом зо закона, з причіны порушованя закона о фундаціях. На членьскій громадї бісїдовало ся о тім, же Фундація Руського клубу 1923 реално не выконує добродительскы дїла, і то є так важне порушіня закона, же бы мала быти зрушена.

З тым є повязаный і четвертый пункт узнесїня, в котрім членове повірили Выконный выбор подати вызву на Міністерство внутрїшнїх дїл Словацькой републікы, жебы была схвалена пропозіція Додатку чісло 2 фундаційной листины Фундації Руського клубу 1923 із дня 19-го януара 2024 з причіны грубого порушіня фундаційной листины.

Як сьме ся дізнали од председы Руського клубу 1923 Федора Віца, фундація посередництвом свого адвоката і далше робить крокы, жебы забранити приступ до Руського дому і спохыбнити властництво будовы, на котру оправданы претензії робить собі Руськый клуб 1923, зато о далшых дїях в тій справі будеме інформовати.

Петро МЕДВІДЬ, ЛЕМ.фм, языкова і ґрафічна управа: АРК в СР.