10. 6. 2020: Продовжують в обнові Любовняньского замку. Лїтнї акції суть напланованы

Любовняньскый музей в Старій Любовнї, котрый справує Любовнянськый замок, на лїто приготовив богатый културный проґрам. Єдночасно ся буде продовжовати в реконштрукції ґотічного палаца.

Палац Любомірьскых перешов обновов і актуално ся колавдує, но тот рік іщі не буде навщівникам приступный, інформовав о актівітах директор музею Далібор Мікулик.

Літні акції бы ся мали одбыти

Кедьже ся на Словакії увольнюють скоро вшыткы рештрікції, котры были прияты в одношіню ку пандемії нового тіпу коронавірусу, музей і на тото лїто рихтує веце културных подій, котры мають в сканзенї (на фотцї) під Любовняньскім замком вже свою традіцію. Меджі такы події належать і Свято Кіріла і Методія, котры все проходять в рамках державного свята 5-го юла, але і далшы акції а концерты.

Директор доповнив, же в сканзенї знова приготовили День меду, Губертовскы святкованя ці презентацію ремесел предків. Но приготовлены суть і новоты. Наприклад чітаня приповідок у деревяных хыжах, котры суть в сканзенї ці на соломі. Много деревяных хыж, котры суть в сканзенї, походить з русиньскых сел Старолюбовняньского окресу, своє місце там нашла і деревяна церьков з Матисовой. Про дорослых приготовлюють подію під назов Жывот на селї почас вечора і ночі.

Інвестічны проєкты і наперек даній сітуації

Музей ся так само залучів до дотачной сістемы Міністерства културы Словацькой републікы про зневыгоднены ґрупы і выпрацовав ся проєкт на вытворїня простору в сканзенїїпро діти з автізмом.

Утримованя 42-ох обєктів – замку, котрый має в справі Любовняньскый музей, є подля слов директора складным процесом. Моментално ся забезпечують великы выпадкы мурива, старають ся о деревяны хыжы і ареал, котрый має сім гектарів. Музей зробив і проєкт про жадость фінанцій з норвеґійскых фондів на конзервацію і презентацію воєньскых касарень замку, а так само про стабілізацію северовыходной стїны замку.

Мікулик додавать, же навщівность словацькых музеїв, ґалерій, градів і замків є важнов проблемов і думать, же то так буде і почас слїдуючого року. „Є то барз складне, кедьже грошы од навщівника творили некомпензовательну часть розрахунку. Вікенды суть на замку і в сканзенї барз добры. Но робочі днї, кедь ходили школьскы заязды і польскы турісты, суть натеперь скоро нуловы,“ сконштатовав про аґентуру директор.

Здрой: Петро МЕДВІДЬ, ЛЕМ.фм,  управа: редакція АРК в СР,  фотоґрафіяЛюбовняньскый музей.

Script logo