10. 5. 2023: Село Чірч хоче векшу капаціту школы. Будовати буде сельска фірма

В селї Чірч, Старолюбовняньского окресу, хотять на звекшіня капаціты основной школы з матерьсков школов здобыти средства з плану обновы.

Як інформовав аґентуру TASR староста села Михал Дїдик, самосправа недавно підписала контракт із зготовителём ставебных робот, а єдночасно рихтує публічне обстараваня на додавателя выбавліня школы.

Звекшыть ся капаціта о 100 процент

„Покля будеме зо своёв жадостёв успішны, пак з будованём бы сьме хотїли зачати в слїдуючім роцї. Но іщі передтым хочеме мати приготовлены вшыткы потребны дїла,“ повів староста.

На надбудованя і прибудованя новых просторів має подля публікованого контракту іти веце як 920 тісяч евр. Кілько піде на выбавлїня учебных клас, буде подля старосты ясне по публічнім конкурзї, аж пак подають жадость о дотацію.

Школярї другого ступеня в селї Чірч мусять того часу ходити до сел околіц, кажде рано ходить автобус повный дітей наприклад до 10 кілометрів оддаленого Орлова. Вдяка розбудованю школы выникне вісем клас, і далшы шпеціалны учебны класы, а капаціта школы бы ся мала звекшыти о 100 процент.

Чірч бы так мав такзвану повно орґанізовану школу, значіть мав бы першый і другый ступень основной школы.

Перерабляли уж в минулости

Основна школа в русиньскім селї Чірч уж в минулости перешла частковов реконштрукційов, котра помогла ку шпорїню енерґій. Вдяка дотації в сумі 320 тісяч евр так само самосправа перед штирёма роками зреконштруовала а розшырила і матерьску школу.

Но кількость жытелїв в сеїі безперерывно росне, за остатнїх десять років там прибыло понад 200 обывателїв. Староста то приписує главно будованю новых арендованых сільскых квартелїв, будованю локаліт на будованя родинных домів і потребной інфраштруктуры.

Зготовителём робот на розбудованю школы буде сільска фірма Солиско Чірч.

Актуално в нїй самосправа давать роботу 15-ём людям, староста думать, же кількость робітників той фірмы так само буде звекшыть ся.

За ёго словами мають в планї будовати далшы два домы з кавртелями з фінанцій Державного фонду розвитку бываня. Покля буде село успішне і в тім проєктї, фірма подля старосты уж не буде мати доста робітників.

Проєкт соціалного поднику в селї фунґує штири рокы. За тот період подарило ся селу збудовати дакілько домів, матерьску школу, комунітный центер, але фірма Солиско Чірч робила і ходникы, драгы ці каналізацію.

Петро МЕДВІДЬ, ЛЕМ.фм, языкова і ґрафічна управа: АРК в СР.