10. 5. 2019: Елена ХОМОВА: Ідеш світом, Огень, О молитві, Тобі, мій Боже (Стихы)

Ідеш світом
Ідеш драгов, ідеш світом
хоць за домом сердце болить,
стараш ся, хто в чуджім краю
тобі дверї поотворить.

Де лем прийдеш, ты памятай,
ты єсь Русин
ты натура русиньска,
не забывай
на бісїду
на коренї роду свого,
де бы не быв ты у світї,
гордо голось ся до нёго.

 

Признавай ся 
ку матери,
ку вірї своїй,
ку предкам
і  ку родній груди...
бо ты 
мій любій сыну
Русин спід Карпат
на то ниґда не забудь.

 

Огень
Минута змінить годинам час
жытя не вернеш, огень згас.
Свічка горить догоры до неба,
дым тягать кадыль де треба,
Огень – то слуга і пан
сухый стог згорів сам
лем
попіл зістав.

О молитві 
Дїткы,
як підете вечур спати,
треба ся вам перехрестити,
ангелика попросити
няй од злого вас хоронить,
добрї сны будете снити. 
При постільцї ангелик,
в ночі буде вартовати.

Клякнийте на колїнка,
зложте собі ручкы
і перед святым образчіком 
молити ся зачнийте.

Просьте малого Ісуска,
най дасть силу
най дасть мудрость
і здравічко,
най хоронить в хыжцї вашій
нянька, маму,
сестрічку і братика.

 

Тобі, мій Боже...
Тобі, мій Боже.
Тобі подарую найкрасшый квіт.
Тобі отворю двереї до сердця.
Тобі єдному буду служити,
    хоць піду краём в шырокый світ. 
Тобі заспівам співаночку шумну
    глубоко з душі... 
    на многая лїт.
Тобі на престол. 
Тобі принесу.
Тобі оферу
    перед хрест положу –
        любов і молитву
        сердце і квіт.