10. 11. 2020: На Зепмлінї найменшу частку позітівно тестованых має окрес Меджілабірцї

Найменшу частку жытелїв позітівно тестованых на новый коронавірус в рамках другого кола тестованя має в реґіонї Земплін окрес Меджілабірцї. Наопак, найвеце їх є в окресї Воронів над Топлёв.

Тото выходить із резултатів тестованя, котры словацькій пресаґентурї TASR додало Міністерство обраны Словацькой републікы. Друге коло тестованя проходило через вікенд 7-го і 8-го новембра 2020-го року. Хоць словацька влада наперед думала над тестованём цїлой Словакії, як то было в першім колї почас попереднього вікенду, наконець друге коло проходило лем в окресах, де в першім колї было над 0,7 процента тестованых позітівных. Было то векшынов у окресах на северї Словакії.

Меджілабірцї під 0,3 процента

В окресї Меджілабірцї, котрый є найменшым на Словакії і єдночасно найрусиньскішым окресом, у другім колі акції Сполочна одповідность брало участь довєдна 6142 людей. Позітівный резултат антіґенового тесту мало 17 з них, значіть частка позітівно тестованых представлює 0,28 процента. Окрес Меджілабірцї ся лем недавно дістав меджі червены окресы на пандемічнім семафорї, причім в першій волнї пандемії, котра проходила почас яри, ся довго тримав як єдиный окрес без інфікованых в рамках цїлой Словакії. Теперь ся знова має шансу дістати меджі безпечнїшы окресы. В рамках реґіону Земплін другу найнизшу частку позітівно інфікованых мав нижнёземпліньскый окрес Собранцї. Там взяло на тестованю участь 12 966 жытелїв, причім позітівно тестованых было 43 людей, што представлює 0,33 процента. В далшім окресї реґіону Земплін, в котрім так само є русиньске населїня, окресї Снина, была частка позітівно тестованых на уровни 0,57 процента, окрес Гуменне скінчів з 0,6 процента позітівно тестованых.

Оголошене далше тестованя

Друге коло тестованя проходило в 45-ёх окресах Словакії, котры мали тыждень перед тым над 0,7 процента інфікованых, але і в далшых 13-ёх зеленых окресах, де ся могли люде отестовати антіґеновыма тестами добровольно. Спомеджі веце як 2 міліонів отестованых было позітівно тестованых 13 509 людей. То представлює 0,66 процента. Далше коло тестованя на хвороту COVID-19 на Словакії бы ся мало дотуляти лем коло 500 сел і 5-ёх меншых міст, не цїлых окресів, або цїлой країны. Проходити бы мало через вікенд 21-го і 22-го новембра. Інформовав о тім премєр Іґор Матовіч по понедільковім засїданю Централного крізового штабу. Як інформовав Матовіч, дав пропозіцію, жебы ся высловно тестовали лем села і міста, де інціденція в другім колї тестованя была высша як єдно проценто.

Тестують і на граніці з Українов

Од понедїлька, 9-го новембра, є складнїше і путованя меджі Словакіёв і Українов. Особы, котры приходять з україньского боку можуть хосновати лем гранічный переход Ужгород – Вышнє Нїмецьке, і то лем у становеленых годинах, а не цїлых 24 годин. На граніцї ся мусять зохабити отестовати антіґеновым тестом. Окрем того, платить і далше повинна домашня карантена, і найскорїше на пятый день карантены мусять особы, котры пришли на Словакію із Україны, іти на точнїшый PCR тест. Державный секретарь Міністерства загранічных дїл і европскых справ Словацькой републікы Мартін Клус то означів за пілотну акцію. Таке саме тестованя бы ся подля Клуса могло запровадити і на чеській ці польскій граніцї, покля бы Словакія записала меджі різіковы країны і Польщу. Главнов думков такого приступу є, жебы не закрывати граніцї, як то было почас ярьной волны пандемії.

Петро МЕДВІДЬ, лем.фм, жрідло фотоґрафії: Радвань над Лабірцём, языкова управа: ред. АРК в СР.

Script logo