10. 10. 2024: ТАД одпремєрує пєсу Пінязї

В пятніцю, 11-го октобра 2024-го року, в Театрї Александра Духновіча в Пряшові одбуде ся перша премєра новой театралной сезоны. Русиньскый театер одпремєрує пєсу Дода Ґомбара під назвов Пінязі. Режії хопила ся гостююча режісерка Алена Вісел Лелкова.

Рїшіня дати тоту пєсу до репертоара Театру Александра Духновіча (ТАД) пояснив драматурґ інсценації Мірон Пукан тым, же то намага выкрыти „біле місце“, кедьже ТАД уж довше не грав сучасну словацьку драму. „Очекуєме, же своёв актуалностёв ословить вшыткы верствы публікы. Через гуморны уровни рїшыть каждоденны сітуації. Авторів гумор є ласкавый і болістный,“ цітує Пукана аґентура TASR.

Режісерка, котра перед тым робила в ТАД режію в році 2014 повіла, же автор тексту єй ословлює тым, як зображує меджілюдьскы односины сучасників, што їй є близке.

„Пєса є повна выключно актуалных проблем односин на різных ґенерачных уровнях. Кедьже собі усвідомлюю, же ТАД не належыть ку фінанчно богатым театрам, та мусили сьме роздумовати, што вшытко собі можеме доволити із сценов. Навеце, театер є заяздовый, значіть і тото мы решпектовали,“ сконштатовала Лелкова.

Директор театру Маріян Марко в тій пєсї видить добру нагоду, жебы ословити публіку в шыршім реґіонї, де ТАД із своїма інсценаціями ходить. Так само повів, же при каждій єдній інсенації, котру театер робить, є тугов драматічного колектіву і то, жебы были запрошены на даякый фестівал.

В новій пєсї на сценї буде мож відїти Мартіна Оравца, Зузану Ковалчікову в алтернації з Міріямов Федорковов, Євґенія Либезнюка, Володиміра Рогача, Йосифа Пантликаша, Йосифа Ткача і Василя Русиняка.

Музику до інсценації скопмоновав Мартін Гусовскый, і переклад на русиньскый язык робила Анна Кузмякова.

Петро МЕДВІДЬ, ЛЕМ.фм, языкова і ґрафічна управа: АРК в СР.