1. 9. 2021: Маґочій в Ужгородї одпрезентує книжку о формованю народного самоусвідомлїня на Підкарпатьскій Руси

Перше выданя книжкы по україньскы вышло іщі у 1994-ім роцї.

Лем недавно ужгородьске Выдавательство Валерія Падяка перевыдало на україньскім языку америцькый бестселер з пера русиньского вченого проф. Павла Роберта Маґочія. Іде о книжку, котра вышла першый раз в америцькім Гарвардї у 1978-ім роцї під назвов The Shaping of а National Identity: Subcarpathian Rus’.

Книжка Маґочія о формованю народного самоусвідомлїня на Підкарпатьскій Руси свого часу, кедь была выдана по анґліцькы, выкликала „інтерес в кругу понад півміліоновой русиньской громады США і меджі науковцями, політіками, етнолоґами Северной Америкы і Европы (окрем Совєтьского союзу, де книжка не мала жадной шансы быти выданов),“ інформовав нашу редакцію выдаватель Валерій Падяк.

Свіжа україньска верзія з понад 750 сторінками під назвов „Підкарпатська Русь: формування національної самосвідомості (1848-1948)‟ є другым доповненым выданём, котрому зробив спередслово доц. Володимір Феніч, к.н. Перше выданя той книжкы по україньскы обявило ся іщі у 1994-ім роцї.

Моноґрафія Маґочія зосереджать увагу на шпеціфічны особливости формованя карпаторусиньской народной ідентіты на Підкарпатьскій Руси почас цїлого столїтя – од періоду Весны народів у 1848-ім роцї, аж до завершіня Другой світовой войны, коли было Підкарпатя анектоване Москвов і приєднане до совєтьской Україны.

Як інформовав Валерій Падяк, выдательство планує зорґанізовати серію презентацій новой книжкы за участи автора. Перша стрїча з Павлом Робертом Маґочіём одбуде ся в Ужгородї 2-го септембра 2021-го року. Проходити буде в чіталній салї Закарпатьской областной універзалной бібліотекы імени Ф. Потушняка і зачаток презентації є о 16.00 год.

Петро МЕДВІДЬ, ЛЕМ.фм, ґрафічна і языкова управа: ред. АРК в СР.