1. 8. 2022: Передватряна «Бесіда» – уж в вашых хыжах

Такой хвилю пред ближучом ся 42. Лемківском Ватром на Чужыні явил ся дальшый номер часопису Стоваришыня Лемків – «Бесіда», ч. 4 (187) за місяці липец/серпен 2022 р.

Сесе выданя приносит реляциі з подій, якы за остатні два місяці проходили на Лемковині і інчых землях, де жыют Русины.

В посліднім выданю прочытаме м.ін. статі:

  • Петро Медвідь, Ден Русинів Словациі;
  • Демко Трохановскій, Тыжден з новом книжком – проф. П. Р. Маґочій: «Я, як раз, не виджу скорого кінця Карпаторусинів;
  • Севериян Косовскій, Лемкы з Замениц вєдно з сусідами упамятнили 75. річницю выгнаня;
  • Андрий Ковальскій, «Невыплакана істория» Йошка Броды;
  • Петро Трохановскій, ХІ Медженародне Бієнале Лемківской/Русиньской Культуры;
  • Наталия Малецка-Новак, Будут oднавляти памятникы;
  • Наталия Малецка-Новак, Cricoteka, Місяц Фотоґрафіі в Кракові і знимкы лемківской фотоґрафкы;
  • Михал Олеснєвич, Доля Лемка (выімкы);
  • Ірина Савка, Переселенці;
  • Наталия Малецка-Новак, Юстина Михаляк выграла літературный конкурс. 

В «Бесіді» найдете тіж спис подій за остатні два місяці – о чым реляцийонує нам част «Новины, не новины – не лем з Лемковины». Почытаме тіж передрукы з інчых ґазет – польско і словацкоязычных дописів. Явила тіж коротка фотореляция з креницкой выставы образів Христо і Христіана Продановых, богларскых творців.

В части «Одышли од нас/Попращали мы» чытати можеме пращальны слова о бл. п. Алойзи Цабалі, бадачу ікон і спілоснователю сандецкого скансену і бл. п. Юстині Шыманьвской, жытьовой товаришці Андрия Копчы, яка остатніма роками анґажувала ся в орґанізацию подій Стоваришыня Лемків.

Двомісячник «Бесіда» то часопис Головного Заряду Стоваришыня Лемків, выходит од 1989 рока, присвяченый єст збережыню істориі, культуры і языка Лемків, інформуючый о жытю нашой і братніх нам соспільности, плекаючый вірні надіі прадідів і вітців.

«Бесіду» мож почытати в бібліотеці Руской Бурсы в Ґорлицях, котра отворена єст од понеділька до пятниці в год. 09.00-15.00, або по індивідуальным догваріню в інчым терміні. Ґазета є тіж доступна в локальных Кружках Стоваришыня Лемків в Польщы.

Найновшый номер, як тіж архівальны номеры часопису «Бесіда» годны сте придбати в електронічній версиі на сайті www.stowarzyszenielemkow.pl.

Севериян КОСОВСКЫЙ, ЛЕМ.фм.

(Публікуєме в оріґіналї – лемківскім варіантї русиньского языка.)

Script logo