1. 7. 2021: У Кули почина Фестивал аматерских театрох Сербиї

КУЛА – Тогорочни, 62. Фестивал аматерских театрох Сербиї у Кули почина наютре, 2. юлия, а будзе тирвац до 10. юлия. У змагательней часци Фестивалу буду участвовац вкупно осем представи, першого вечара наступи домашнї Културни центер Кула, а попри нїх плановани представи зоз Лесковцу, Бечею, Беоґраду, Трстенику, Смедеревскей Паланки, Приєполя и Крущичу.

Шицки представи починаю на 20 годзин у сали Културного центра Кула, а першого дня на 19 г. будзе отворена подобова вистава у Подобовей ґалериї, потим на 19,30 г. плановане палєнє фестивалского огня и дзвиганє застави, а на 19,50 г. шветочне отверанє и привит госцох.

Остатнього дня фестивала, после преглашеня побиднїка фестивалу, на чесц шицких учашнїкох, публика годна провадзиц ище єдну госцуюцу представу.

Орґанизаторе Фестивалу Союз аматерох Сербиї, Културно-просвитна заєднїца општини Кула и Културни центер Кула, а покровитель Општина Кула.

М. ДЖУДЖАР, РутенпреС

(Публікуєме в оріґіналї – войводиньскім варіантї русиньского языка.)