1. 7. 2021: Папа молив ся перед Клокочівсков Богородіцёв
Од 28-го юна до 2-го юла 2021-го року проходить путь віруючіх Кошіцькой ґрекокатолицькой єпархії в Римі вєдно із чудотворнов Іконов Пресвятой Богородіцї з Клокочова.
Тота путь проходить з нагоды 350-ой рочніцї, одколи Клокочівска Богородіця слызыла. Хоць рочніця, а з тым і Юбілейный рік, припали на минулый рік, путь была з причіны пандемії перенесена. Коло 350 путників з Кошіцькой єпархії веде владыка Кіріл Василь, кошіцькый єпарха. Участный є і владыка Андрій Пацак, емерітный торонтьскый єпарха.
Папа молив ся перед Богородіцёв з Клокочова
29-го юна, на праздник свв. апостолів Петра і Павла, покровителїв Рима, на торжественных богослужінях, котры одправляв Папа римскый Франціск у Ватіканьскій базиліцїі, была выставлена і Ікона Пресвятой Богородіцї з Клокочова, котру там принесли віруючі із своїм єпархом.
Ікона была на честнім місцї, по лївім боцї главного престола, над гробом святого Петра, окрашена білыма ружами.
Святїшый отець на початку і кінцю торжественных боголужінь молив ся перед чудотворнов іконов з Клокочова. На кінцю перед іконов зістав почас цїлого співу Salva Regina, пак з єпіскопскым жезлом в руцї приступив ближе, дотулив ся іконы і перехрестив, інформовав портал Vatican News.
Папа Франціск поздравив путників з Кошіцькой єпархії і на авдієнції 30-го юна. Особно ся поздравив з владыками Кірілом і Андріём, вірных поздравив поздравом Слава Ісусу Хрісту!
Заставили ся і в крижевацькій катедралї
Почас свого путованя до Рима чудотворна ікона заставила ся в суботу, 26-го юна 2021, і в Ґрекокатолицькім катедралнім соборї Пресвятой Тройцї в Крижевацї. Владыків Кіріла і Андрія там привітав крижевацькый єпарха Мілан Стіпіч вєдно із своїма віруючіма. Перед іконов ся в суботу помолили молебен.
Навщіва іконы продовжовала в недїлю архієрейсков літурґіёв, котру служыв архієпіскоп Кіріл, проповідь мав влалдыка Мілан. На кінцю ся перед Клокочівсков Богородіцём помолили Акафіст.
По закінчіню выпроводили жытелї міста Ікону Пресвятой Богородіцї з Клокочова аж на граніцю міста.
Покровителька Земпліна
Тот рік на свято Благовіщенія Пресвятой Богородіцїі быв у вшыткых храмах Ґрекокатолицькой церькви на Словакії прочітаный декрет Конґреґації про восточны церькви, котрым ся выголосила Клокочівска Богородіця за Покровительку Земліна.
До літурґічного календаря ґрекокатоликів на Словакії дістав ся новый праздник з назвов Память чудотворной Клокочівской іконы Пресвятой Богородіцї, Покровителькы Земпліна.
Підпорны писма ку выголошіню Клокочівской Богородіцї за Покровительку Земпліна дали і Монс. Бернард Бобер, кошіцькый римокатолицькый архієпіскоп-метрополіта, і владыка Ґеорґій Страньскый, православный архієпіскоп михалївско-кошіцькый.
Петро МЕДВІДЬ, ЛЕМ.фм, ґрафічна і языкова управа: ред. АРК в СР, жрідло фотоґрафії: Vatican News.
