1. 7. 2019: В Креници одсвяткуют ювілей часопису «Бесіда»

Часопис Стоваришыня Лемків «Бесіда» 12. липця/юлия 2019 р. одпразднує 30-літя діяльности. Споминовый і культурный проґрам з той нагоды одбуде ся в Креници. Святкувати з редакцийом придут дотепернішні редакторы, вельократны кореспонденты і приятелі того найстаршого лемківского часопису в Польщы по 1989 р. Ювілей «Бесіды» сходит ся з 30-літьом Стоваришыня Лемків, котре было основане в квітни/апрілю 1989 р. Внет по тым, 30. червця/юнія вышол першый номер «Бесіды».

 

Рефераты, концерты, спомины

Споминовый проґрам зачне ся о 17.00 год. в конференцийній сали МПҐК при ул. Крашевского в Креници. З вводным словом выступит ведучый Стоваришыня Лемків, Андрий Копча. Пак особисты спомины представит Петро Трохановскій, од початку істнуваня часопису «Бесіда» його головный редактор. Реферат на тему: Як «Бесіда» формувала лемківскіст? Стратеґіі буджыня лемківской достоменности хоснуваны в Бесідовых дописах выголосит абсольвентка лемківской філолоґіі, докторантка Ягайлоньского Університету, Марта Ватраль.

Особливом частю будут выступліня запрошеных гости, головно чысленных кореспондентів, якы за вшыткых тридцет років выдаваня ґазеты публикували на єй картах много текстів. Будут то не лем авторы з Польщы, але тіж

представникы русиньскых медий, журналисты зо Словациі і Украіны.

Артистичный проґрам обогаченый буде выступами двох інтерпретаторок лемківской музикы. Найпшерше в більше традицийным виді запрезентує свою творчіст Юлия Дошна. Сусанна Яра выступит так само з репертуаром русиньскых пісен, котры рыхтує в модерных, альтернативных обробках. Гушлярскій дует, Мариюш Мончак і Миколай Мончак, заграт творы мадярского композитора і піяністы Белі Бартока. На конец артистичной части запрезентує ся тіж русиньскій фольклорный ансамбль Барвінок з Камюнкы.

Редакция плянує одкрыти принагідну выставу присвячену 30-літю часопису і так само ювілею Стоваришыня Лемків.

 

Річницю має і «Голос Ватры»

Хоц подія присвячена єст річници «Бесіды», буде на ній припоминаный і «Голос Ватры» – першый повоєнный лемківскій ча­сопис, выдаваный з нагоды Лемківской Ватры, котра была скликана на потребы артистичных варшататів ансамблю Лемковина з Білянкы. Часопис першый раз вышол 35 років тому, в 1984 і был выдаваный до 1989 р.

Фактично «Голос Ватры» зачал выходити од ІІ Лемківской Ватры. Першый номер зредаґували Петро Трохановскій і Володислав Грабан, а технічну редакцию зробил Петро Клинковскій. В дальшых роках до редакциі доходили інчы особы. В 1987 р. Петро Трохановскій стал головным редактором часопису і был ним до кіцня. Першый номер был надрукуваный в 1000 примірників.

Коли по VII Лемківскій Ватрі в Бортным, на зламі 1989/90 рр., орґанізация Лемківской Ватры была підступом перенята через проукраіньскых

діячы, головный редактор «Голосу Ватры», П. Трохановскій, рішыл выдавати нову ґазету при основаным Стоваришыню Лемків. Так ся зачала істория «Бесіды», котру треба менувати моральным і фактичным наступцьом «Голосу Ватры».

Севериян КОСОВСКЫЙ, ЛЕМ.фм

(Публікуєме в оріґіналї – лемківскім варіантї русиньского языка.)